കോഴിക്കോട്: കോഴിക്കോട് ജില്ലയിലെ മുഴുവൻ എസ്.എൻ.ഡി.പി യൂണിയനുകളും ജനറൽ സെക്രട്ടറി വെള്ളാപ്പള്ളി നടേശന് പിന്തുണ പ്രഖ്യാപിച്ചു.

പത്ത് യൂണിയൻ ഭാരവാഹികളും പ്രസ് ക്ളബ്ബിൽ എത്തി വാർത്താസമ്മേളനം നടത്തിയാണ് പിന്തുണ പ്രഖ്യാപിച്ചത്.

എസ്.എൻ.ഡി.പി പ്രസ്ഥാനത്തെയും യോഗം ജനറൽ സെക്രട്ടറിയെയും പൊതുജന മദ്ധ്യത്തിൽ അപമാനിക്കുകയും കണക്കിൽ കൃത്രിമം കാട്ടി എസ്.എൻ.ഡി.പിയുടെ കോടിക്കണക്കിന് രൂപ തിരിമറി നടത്തുകയും ചെയ്ത മാവേലിക്കര യൂണിയൻ മുൻ പ്രസിഡന്റ് സുഭാഷ് വാസുവിനെതിരെ ക്രിമിനൽ നടപടി സ്വീകരിക്കണമെന്നും അവർ യോഗം നേതൃത്വത്തോട് ആവശ്യപ്പെട്ടു.ഇതോടൊപ്പം എസ്.എൻ.ഡി.പിയുടെ പ്രാഥമിക അംഗത്വത്തിൽ നിന്ന് മാറ്റി നിറുത്തുകയും വേണം.ഇക്കാര്യത്തിൽ യോഗനേതൃത്വം സ്വീകരിച്ച നടപടിയോട് യോജിക്കുന്നുവെന്നും ഭാരവാഹികൾ പറഞ്ഞു.

വാർത്താസമ്മേളനത്തിൽ പി.എം രവീന്ദ്രൻ (വടകര ), സി.കെ മുരളി (പയ്യോളി ), ദാസൻ പറമ്പത്ത് (കൊയിലാണ്ടി ),കുഞ്ഞിക്കണാരൻ (പേരാമ്പ്ര ),ശ്രീനി (ബാലുശേരി ), ഗിരി പാമ്പനാൽ (തിരുവമ്പാടി ), പി.സി അശോകൻ (തിരുവമ്പാടി ),ഷാജു ചമ്മിണി (ബേപ്പൂർ ),സുധീഷ് കേശവപുരി (കോഴിക്കോട് ),സതീഷ് കുറ്റിയിൽ (സിറ്റി യൂണിയൻ) എന്നിവർ പങ്കെടുത്തു.