പാലാ: തിരുളാലത്തപ്പന് തിരുവാതിരപ്പുഴുക്ക് നേദിക്കാൻ എട്ടങ്ങാടി എസ്.എൻ.ഡി.പി. യോഗം പാലാ ടൗൺ ശാഖാ വക. ഇന്ന് വൈകിട്ട് 5ന് ഭക്തിനിർഭരമായ താലപ്പൊലി ഘോഷയാത്രയോടെയാണ് മഹാദേവന് എട്ടങ്ങാടി സമർപ്പിക്കുന്നതെന്ന് പാലാ ടൗൺ ശാഖാ നേതാക്കളായ പി.ജി. അനിൽകുമാർ, ബിന്ദു മനത്താനം എന്നിവർ പറഞ്ഞു.

പാലാ ളാലം പാലം ജംഗ്ഷനിൽ നിന്നും എട്ടങ്ങാടി പൂത്താലം ഘോഷയാത്ര ആരംഭിക്കും. വാദ്യമേളങ്ങൾ അകമ്പടിയാകും. പ്രത്യേകം തയ്യാറാക്കിയ വാഹനത്തിൽ എട്ടങ്ങാടി വസ്തുക്കൾ നിറയ്ക്കും. താലഘോഷയാത്രയ്ക്കു പിന്നിലായി ഇത് നീങ്ങും. ഘോഷയാത്ര മെയിൻ റോഡിലൂടെ വന്ന് ടി.ബി. റോഡിലൂടെ ളാലം 6 മണിയോടെ ക്ഷേത്ര കവാടത്തിലെത്തും. ക്ഷേത്രോപദേശക സമിതി നേതാക്കളായ പുത്തൂർ പരമേശ്വരൻ നായർ, അഡ്വ. രാജേഷ് പല്ലാട്ട്, പി.ആർ. നാരായണൻകുട്ടി അരുൺ നിവാസ് , ഉണ്ണി അശോക, ശ്രീകുമാർ കളരിക്കൽ, മാതൃസമിതി പ്രസിഡന്റ് ടി. ഐ. ലീല എന്നിവർ ചേർന്ന് എട്ടങ്ങാടി ഘോഷയാത്രയെ സ്വീകരിച്ച് ക്ഷേത്രാങ്കണത്തിലേക്ക് ആനയിക്കും. ക്ഷേത്രത്തിന് ഒന്ന് വലം വെച്ച് താലം സമർപ്പിച്ച് ശാഖാ നേതാക്കളായ പി.ജി. അനിൽകുമാർ, ബിന്ദു മനത്താനം എന്നിവരുടെ നേതൃത്വത്തിൽ ശാഖാ പ്രവർത്തകർ എട്ടങ്ങാടി വിഭവങ്ങൾ തിരുനടയിൽ സമർപ്പിക്കും. എട്ടങ്ങാടി സമർപ്പിച്ച ടൗൺ ശാഖാ പ്രവർത്തകർക്ക്, ക്ഷേത്രോപദേശക സമിതി പ്രസിഡന്റ് പുത്തൂർ പരമേശ്വരൻ നായർ നന്ദി പറയും. തുടർന്ന് ദീപാരാധനയും ചുറ്റുവിളക്കും നടക്കും. ടൗൺ ശാഖയിൽ നിന്ന് സമർപ്പിച്ച വിഭവങ്ങൾ ഉൾക്കൊള്ളിച്ചുള്ള എട്ടങ്ങാടി നിവേദ്യം ആറാട്ട് നാളായ വെള്ളിയാഴ്ച ഉച്ചയ്ക്ക് 1 മണി മുതൽ ഭക്തർക്ക് വിതരണം ചെയ്യും.: