കോട്ടയം: പുതുവർഷത്തിന്റെ പുതുമോടി മാറും മുൻപ് ജില്ലയിലെ റോഡുകൾ കൂട്ടക്കുരുതിയ്‌ക്കു വേദിയാകുന്നു. ഏഴു ദിവസത്തിനിടെ മുപ്പത് അപകടങ്ങളിലായി 14 മരണങ്ങളാണ് ഉണ്ടായത്. പുതുവർഷ ദിനത്തിൽ തന്നെ രണ്ട് അപകടങ്ങളിൽ രണ്ടു പേർ മരിച്ചു.

അപകടങ്ങൾ

2020 ജനുവരി ഒന്ന്

വാഗമണ്ണിൽ നിന്ന് മടങ്ങിയ യുവാക്കളുടെ സംഘം സഞ്ചരിച്ച ബൈക്ക് ഭരണങ്ങാനം - ഇടമറ്റം റോഡിൽ വിലങ്ങുപാറയിൽ കാറുമായി കൂട്ടിയിടിച്ച് ഒരു മരണം. പുതുപ്പള്ളി എള്ളുകാലാ മാടയ്ക്കൽ രാധാകൃഷ്ണന്റെ (അനിയൻകുഞ്ഞ്) മകൻ എം.ആർ വിഷ്ണു (22) ആണ് മരിച്ചത്. ഒപ്പമുണ്ടായിരുന്ന പാമ്പാടി മീനടം കുരിയക്കാട്ട് അരുണിന് (22) പരിക്കേറ്റു.

വൈക്കത്ത് ബൈക്ക് കൈവരിയിൽ ഇടിച്ച് കാരയിൽ മഠത്തിപ്പറമ്പിൽ ബൈജുവിന്റെ മകൻ പൂത്തോട്ട കെ.എം.എച്ച്.എസ് സ്‌കൂളിലെ പത്താം ക്ലാസ് വിദ്യാർത്ഥി അതുൽ കൃഷ്‌ണ (അച്ചു -15) മരിച്ചു. ഒപ്പമുണ്ടായിരുന്ന മഠത്തിൽപ്പറമ്പിൽ വിനു (31), മഠത്തിൽപറമ്പിൽ ശരത്ത് (28) എന്നിവർക്ക് പരിക്കേറ്റു.

ജനുവരി രണ്ട്

കാഞ്ഞിരപ്പള്ളിയിൽ സ്വകാര്യ ബസ് ഇടിച്ച് കാൽനടയാത്രക്കാരൻ പാലപ്ര കിഴക്കേതിൽ രാജേന്ദ്രൻ നായർ (ടി.ജി ഷാജി - 53) മരിച്ചു.

ജനുവരി നാല്

പുതുവർഷ ദിനത്തിൽ രാമപുരത്ത് അയ്യപ്പഭക്തർ സഞ്ചരിച്ച കാർ ഇടിച്ച് പരിക്കേറ്റ രാമപുരം പുത്തൻപുരയ്‌ക്കൽ രാജൻ (അഗസ്റ്റിൻ - 52) മരിച്ചു. രാമപുരം ഫെഡറൽ ബാങ്കിനു മുന്നിലുണ്ടായ അപകടത്തിൽ പരിക്കേറ്റ് മെഡിക്കൽ കോളേജ് ആശുപത്രിയിൽ ചികിത്സയിലായിരുന്നു.

ചിങ്ങവനം സെമിനാരിപ്പടി പുത്തൻകാല ഭാഗത്ത് നിയന്ത്രണം വിട്ട് ബൈക്ക് മതിലിൽ ഇടിച്ച് പാലക്കാട് സ്വദേശിയായ മാങ്കുറിശി പെരുമ്പാംപറമ്പ് സദാനന്ദന്റെ മകൻ അനുപ് (25) മരിച്ചു. മുണ്ടക്കയം പുഞ്ചവയൽ സ്വദേശി ബിനുവിനു (23) പരിക്കേറ്റു.

കാറിടിച്ച് ചികിത്സയിലായിരുന്ന വല്യവീട്ടിൽ ബാബുവിന്റെ ഭാര്യ അന്നമ്മ (തങ്കമ്മ - 67) മരിച്ചു. വടവാതൂർ ജംഗ്ഷനിൽ റോഡിനു കുറുകെ കടക്കുന്നതിനിടെ കാർ ഇടിക്കുകയായിരുന്നു.

ജനുവരി ആറ്

പാലാ അല്ലാപ്പാറയിൽ അയ്യപ്പൻമാരുടെ വാഹനം നിയന്ത്രണം വിട്ട് ഇടിച്ചു കയറി രണ്ടു പേർ മരിച്ചു. ലോട്ടറി വിൽപ്പനക്കാരൻ പാലാ ചാത്തങ്കുന്നേൽ കോളനിയിൽ കല്ലറയ്ക്കൽ താഴെ പി.എ ചന്ദ്രൻ (55), ശബരിമല തീർത്ഥാടകൻ ആന്ധ്രാപ്രദേശ് റായ്ബർഗ് സ്വദേശി രാജു (40) എന്നിവരാണ് മരിച്ചത്. അപകടത്തിൽ ഒൻപത് അയ്യപ്പഭക്തർക്ക് പരിക്കേറ്റു.

ചങ്ങനാശേരി നാലുകോടിയിൽ ടോറസ് ലോറി സ്‌കൂട്ടറിൽ ഇടിച്ച് സ്‌കൂട്ടർ യാത്രക്കാരൻ നാലുകോടി ഉൾപ്രക്കാട്ട് മാത്യു ആന്റണി (സണ്ണിച്ചൻ - 60) മരിച്ചു.

അമിത വേഗത്തിലെത്തിയ മിനി ലോറി ഇടിച്ച് കാൽനടയാത്രക്കാരനായ മണിമല ചെറുവള്ളി വട്ടവരമ്പ് വീട്ടിൽ അപ്രേം ചാക്കോ (കൊച്ചായൻ - 75) മരിച്ചു. മകളുടെ വീട്ടിൽ നിന്നും നടക്കാനിറങ്ങിയതാണിദ്ദേഹം.

വൈക്കം ഉല്ലലയ്ക്കു സമീപം പിക്കപ്പ് വാൻ ഇടിച്ച് തോട്ടകം കട്ടത്തറ വീട്ടിൽ തോമസ് (58) മരിച്ചു. പാടശേഖരങ്ങളിൽ മോട്ടോർ സ്ഥാപിച്ച ശേഷം വീട്ടിലേയ്ക്കു നടന്നു പോകുന്നതിനിടെയായിരുന്നു അപകടം.

ജനുവരി ഏഴ്

വൈക്കത്ത് കാറിൽ സ്വകാര്യ ബസ് ഇടിച്ച് ഒരു കുടുംബത്തിലെ നാലു പേർ മരിച്ചു.