ചിങ്ങവനം: എം.സി റോഡിൽ പള്ളം കെ.എസ്.ഇ.ബി ഓഫീസിന് സമീപം ബൈക്കിടിച്ച് റോഡിലേക്ക് തെറിച്ചുവീണ ഓട്ടോ ഡ്രൈവർ മിനി ലോറിയുടെ അടിയിൽപ്പെട്ടു മരിച്ചു. അപകടശേഷം നിറുത്താതെപോയ ലോറി കണ്ടെത്താനായില്ല. പാക്കിൽ പൂവത്തുമൂട്ടിൽ ഉലഹന്നാൻ പോത്തൻ(രാജു-61) ആണ് മരിച്ചത്. അപകടത്തിൽ പരിക്കേറ്റ ബൈക്ക് യാത്രക്കാരായ ആസിഫ്, അലക്‌സ് പോൾ എന്നിവർ കോട്ടയം മെഡിക്കൽ കോളേജിൽ ചികിത്സയിലാണ്. ചൊവ്വാഴ്ച വൈകിട്ട് 6.30നായിരുന്നു സംഭവം. പാക്കിൽ സ്റ്റാൻഡിലെ ഓട്ടോ ഡ്രൈവറാണ് രാജു. ഓട്ടോറിക്ഷ റോഡരികിൽ നിറുത്തിയ ശേഷം സമീപത്തെ കടയിലേക്ക് പോകാൻ റോഡ് മുറിച്ച് കടക്കുന്നതിനിടെ രാജുവിനെ ചിങ്ങവനം ഭാഗത്തു നിന്നും വരികയായിരുന്ന ബൈക്ക് ഇടിച്ചു വീഴ്ത്തുകയായിരുന്നു. രാജു റോഡിലേക്ക് തലയടിച്ചു വീഴുകയായിരുന്നു. ഈസമയം പിന്നാലെയെത്തിയ മിനിലോറി രാജുവിന്റെ ശരീരത്തിൽ കൂടി കയറിയിറങ്ങുകയായിരുന്നുവെന്ന് ദൃസാക്ഷികൾ പറയുന്നു. നാട്ടുകാർ ഉടൻ തന്നെ രാജുവിനെ ജില്ലാ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. ചിങ്ങവനം പൊലീസ് മേൽനടപടികൾ സ്വീകരിച്ചു. മൃതദേഹം പോസ്റ്റുമോർട്ടത്തിന് ശേഷം ബന്ധുക്കൾക്ക് വിട്ടുകൊടുത്തു. സംസ്‌കാരം ഇന്ന് ഉച്ചകഴിഞ്ഞ് രണ്ടിന് കാരമൂട് സെന്റ്‌ മേരീസ് ഓർത്തഡോക്‌സ് പള്ളി സെമിത്തേരിയിൽ. ഭാര്യ: വാകത്താനം മൈലക്കാട്ട് കുടുംബാംഗം വൽസമ്മ. മക്കൾ: ടിന്റു, ടിൻസി, ടിറ്റു. മരുമക്കൾ: പയസ്‌ലാൽ, ബിനിഷ്.