മാടപ്പള്ളി: ബ്ലോക്ക് പഞ്ചായത്ത് പരിധിയിൽ ലൈഫ് മിഷൻ മുഖേന വീടു ലഭിച്ചവരുടെ കുടുംബ സംഗമവും അദാലത്തും ബ്ലോക്ക് പഞ്ചായത്ത് അങ്കണത്തിൽ നടന്നു. 284 കുടുംബങ്ങളിൽനിന്ന് അറുന്നൂറോളം പേർ പങ്കെടുത്തു. ബ്ലോക്ക് പഞ്ചായത്ത് പ്രസിഡന്റ് രാഖി കലേഷ്‌കുമാർ ഉദ്ഘാടനം ചെയ്തു. ബ്ലോക്ക് പഞ്ചായത്ത് വൈസ് പ്രസിഡന്റ് ജോൺസൺ അലക്‌സാണ്ടർ അദ്ധ്യക്ഷത വഹിച്ചു. മാടപ്പള്ളി ഗ്രാമപഞ്ചായത്ത് പ്രസിഡന്റ് ലൈസാമ്മ മുളവന, ബ്ലോക്ക്പഞ്ചായത്ത് സ്ഥിരം സമിതി അദ്ധ്യക്ഷൻമാരായ അലക്‌സാണ്ടർ പ്രാക്കുഴി, ലൈസാമ്മ ജോർജ്, മണിയമ്മ രാജപ്പൻ, ദാരിദ്ര്യ ലഘുകരണ വിഭാഗം പ്രോജക്ട് ഡയറക്ടർ പി. എസ്. ഷിനോ, ലൈഫ് മിഷൻ ജില്ലാ കോ-ഓർഡിനേറ്റർ സി.എൻ. സുഭാഷ്, ബി.ഡി.ഒ ജയ്‌മോൻ ഏബ്രഹാം, ബ്ലോക്ക് പഞ്ചായത്തംഗങ്ങൾ, മറ്റ് ജനപ്രതിനിധികൾ, ഉദ്യോഗസ്ഥർ തുടങ്ങിയവർ പങ്കെടുത്തു.

ലൈഫ് മിഷൻ ഗുണഭോക്താക്കൾക്ക് സർക്കാരിന്റെ തുടർസേവനങ്ങൾ ലഭ്യമാക്കുന്നതിനായി 20 വകുപ്പുകളുടെ സഹകരണത്തോടെ നടത്തിയ അദാലത്തിൽ ലഭിച്ച 591 അപേക്ഷകളിൽ 486 എണ്ണത്തിൽ തീർപ്പുകൽപ്പിച്ചു. സംഗമത്തിന് എത്തിയവർക്ക് ബ്ലോക്ക് പഞ്ചായത്ത് പ്രസിഡന്റ് പച്ചക്കറി തൈകൾ വിതരണം ചെയ്തു.

 ബ്ലോക്കിലെ ഗ്രാമപഞ്ചായത്തുകളിൽ ഏറ്റവുമധികം വീടുകൾ പൂർത്തിയാക്കിയത് തൃക്കൊടിത്താനമാണ് 68 എണ്ണം. പായിപ്പാട് 51, മാടപ്പളളി 47, വാഴപ്പള്ളി 31, വാകത്താനം 67 എന്നിങ്ങനെയാണ് മറ്റു പഞ്ചായത്തുകളിലെ കണക്ക്. പട്ടികജാതി വിഭാഗത്തിലുള്ളവരുടെ നിർമാണം മുടങ്ങിക്കിടന്ന 20 വീടുകൾ പൂർത്തീകരിച്ചു.