ചങ്ങനാശ്ശേരി: നഗരസഭയിൽ ലൈഫ് പി.എം.എ.വൈ പദ്ധതികൾ മുഖേന വീട് നിർമിച്ച 100 കുടുംബങ്ങൾക്ക് ഗുണഭോക്താക്കളുടെ കുടുംബ സംഗമത്തോടനുബന്ധിച്ച് താക്കോൽ കൈമാറി. വാഴപ്പളളി സ്വദേശിനി ഉഷ നടരാജന് ആദ്യ താക്കോൽ കൈമാറി സംഗമം നഗരസഭ ചെയർമാൻ ലാലിച്ചൻ കുന്നിപ്പറമ്പിൽ ഉദ്ഘാടനം ചെയ്തു.

നഗരസഭയിൽ 211 വീടുകൾ നിർമ്മാണത്തിന്റെ അന്തിമഘട്ടത്തിലാണ്. ലൈഫ് ഭവനസമുച്ചയത്തിനായി ചങ്ങനാശ്ശേരി വില്ലേജിലെ പോത്തോട് ഒന്നരേക്കർ സ്ഥലം കണ്ടെത്തിയിട്ടുണ്ട്. ഇവിടെ 311 കുടുംബങ്ങൾക്ക് വീടുകൾ നൽകാനാണ് ലക്ഷ്യമിട്ടിരിക്കുന്നത്.ഹെൽത്ത് സെന്റർ, അങ്കണവാടി തുടങ്ങിയ സൗകര്യങ്ങളുള്ള ടൗൺഷിപ്പാണ് പോത്തോട് വിഭാവനം ചെയ്തിരിക്കുന്നതെന്ന് നഗരസഭ ചെയർമാൻ പറഞ്ഞു. യോഗത്തിൽ വൈസ് ചെയർപേഴ്‌സൺ അംബിക വിജയൻ അദ്ധ്യക്ഷത വഹിച്ചു. വികസനകാര്യ സ്റ്റാൻഡിംഗ് കമ്മറ്റി ചെയർമാൻ ടി.പി. അനിൽകുമാർ, കൗൺസിലർമാരായ കൃഷ്ണകുമാരി രാജശേഖരൻ, എൻ.പി. കൃഷ്ണകുമാർ, ജെസി ബാബു, സജി തോമസ്, മുനിസിപ്പൽ സെക്രട്ടറി വി.പി. ഷിബു തുടങ്ങിയവർ പങ്കെടുത്തു. പരിപാടിയോടനുബന്ധിച്ച് നടന്ന വിവിധ വകുപ്പുകളുടെ അദാലത്തിൽ ലഭിച്ച 28 പരാതികൾ പരിഹരിച്ചു.