കോട്ടയം : എം.സി റോഡിൽ മണിപ്പുഴ സിവിൽ സപ്ലൈസ് പെട്രോൾ പമ്പിന് സമീപം നാലുവരിപ്പാത തുടങ്ങുന്നിടത്ത് മൂന്നു വാഹനങ്ങൾ കൂട്ടിയിടിച്ച് ഒരാൾക്ക് ഗുരുതരമായി പരിക്കേറ്റു. ബൈക്ക് യാത്രക്കാരനായ ചാന്നാനിക്കാട് സ്വദേശി ജോജിയ്ക്കാണ് (22) പരിക്കേറ്റത്. ജനറൽ ആശുപത്രിയിൽ പ്രവേശിപ്പിച്ച ജോജിയുടെ നില ആതീവഗുരുതരമായതിനെ തുടർന്ന് കോട്ടയം മെഡിക്കൽ കോളേജ് ആശുപത്രിയിലേക്ക് മാറ്റി. ഇന്ന് രാവിലെ എട്ടു മണിയോടെയായിരുന്നുസംഭവം.

റോഡ് മുറിച്ചുകടക്കുകയായിരുന്ന കാൽനടയാത്രക്കാരനെ രക്ഷിക്കാൻ ടോറസ് വെട്ടിച്ചതാണ് അപകടത്തിന് കാരണം. കോട്ടയം ഭാഗത്ത് നിന്ന് വരികയായിരുന്ന ടോറസ് എതിർദിശയിൽ വരികയായിരുന്ന ബൈക്കിൽ ഇടിക്കുകയായിരുന്നു. ഇതോടെ കാറിലും ടോറസ് ഇടിച്ചു. ഇടിയുടെ ആഘാതത്തിൽ ബൈക്ക് യാത്രക്കാരനായ ജോജി തെറിച്ച് ഉയർന്ന് തലയടിച്ച് വീഴുകയായിരുന്നു. റോഡിന്റെ വശത്തായി പാർക്ക് ചെയ്തിരുന്ന ലോറിയിൽ ഇടിച്ചാണ് ഒടുവിൽ ടോറസ് നിന്നത്. ബൈക്കും നിശ്ശേഷം തകർത്തു. കാറിന്റെ ഡോറുകൾക്ക് കേടുപാട് സംഭവിച്ചിട്ടുണ്ട്. ചിങ്ങവനം പൊലീസ് സ്ഥലത്തെത്തി മേൽനടപടികൾ സ്വീകരിച്ചു.