കോട്ടയം: നിയന്ത്രണം വിട്ട ടോറസ് ലോറി കോടിമത നാലുവരിപ്പാതയിൽ കാറിലും ബൈക്കിലും ഇടിച്ചു. പരിക്കേറ്റ ബൈക്ക് യാത്രക്കാരൻ ചാന്നാനിക്കാട് സ്വദേശി ജോജിയെ (22) ജനറൽ ആശുപത്രിയിൽ പ്രവേശിപ്പിച്ചു. ഇന്നലെ രാവിലെ 7.45 ന് മണിപ്പുഴയിലെ സിവിൽ സപ്ലൈസ് പമ്പിനു മുന്നിലായിരുന്നു അപകടം. മണിപ്പുഴയിൽ നിന്ന് കോട്ടയത്തേയ്ക്ക് പോകുകയായിരുന്നു ബൈക്കും കാറും. ഈ സമയം കോടിമത ഭാഗത്ത് നിന്ന് വരികയായിരുന്ന ടോറസ് ലോറി വലത്തേയ്ക്ക് വെട്ടിച്ചപ്പോൾ കാറിൽ ഇടിച്ചു. കാർ റോഡിൽ വട്ടം കറങ്ങി, പിന്നാലെ എത്തിയ ബൈക്കിൽ ടോറസ് ലോറിയും കാറും ഇടിച്ചു.

ഇടിയുടെ ആഘാതത്തിൽ ബൈക്ക് യാത്രക്കാരൻ റോഡിൽ നിന്നും വായുവിലേയ്ക്ക് ഉയർന്നു. നിലത്ത് തലയും കൈയ്യും അടിച്ചാണ് ഇയാൾ വീണത്. ഇടിച്ച കാറും ബൈക്കുമായി മുന്നോട്ട് നിരങ്ങി നീങ്ങിയ ടോറസ് ലോറി , റോഡരികിൽ പാർക്ക് ചെയ്തിരുന്ന ലോറിയിൽ ഇടിച്ചാണ് നിന്നത്. നാട്ടുകാർ ചേർന്നാണ് പരിക്കേറ്റയാളെ ആശുപത്രിയിൽ എത്തിച്ചത്. അപകടത്തെ തുടർന്ന് എം.സി റോഡിൽ 2 മിനിറ്റോളം ഗതാഗതം തടസപ്പെട്ടു.