കല്ലറ: എന്റെ കല്ലറ കോട്ടയത്തിന്റെ നെല്ലറ തരിശുനില നെൽകൃഷി വികസന പദ്ധതിയുടെ നാലാം വാർഷികാഘോഷത്തിന്റെ ഭാഗമായി കല്ലറ ഗ്രാമപഞ്ചായത്തിലെ ഒൻപതാം വാർഡിലെ പറപ്പള്ളിച്ചാൽ പാടശേഖരത്തിൽ ഇന്ന് വിത്തെറിയും. രാവിലെ 10.30 ന് നടക്കുന്ന വിതയുത്സവം ജില്ലാ പഞ്ചായത്ത് പ്രസിഡന്റ് അഡ്വ.സെബാസ്റ്റ്യൻ കുളത്തുങ്കൽ ഉദ്ഘാടനംചെയ്യും. പത്തു വർഷമായി തരിശ് കിടന്ന പതിനേഴര ഏക്കർ പാടശേഖരത്തിൽ 12 പേരടങ്ങുന്ന പാടശേഖര സമിതിയാണ് ഉമ ഇനത്തിൽപ്പെട്ട വിത്ത് വിതയ്ക്കുന്നത്.

യന്ത്രസഹായത്താൽ മണ്ണ് ഇളക്കി വാച്ചാലുകൾ നവീകരിച്ചാണ് തരിശ് ഭൂമി കൃഷിയോഗ്യമാക്കിയത്. കക്ക, വിത്ത് തുടങ്ങിയവ കല്ലറ കൃഷിഭവൻ സൗജന്യമായി വിതരണം ചെയ്തു. കല്ലറ ഗ്രാമപഞ്ചായത്ത് പ്രസിഡന്റ് സൗമ്യ അനൂപ് ചടങ്ങിൽ അദ്ധ്യക്ഷത വഹിക്കും. കൃഷിവകുപ്പിന്റെ സമഗ്ര പച്ചക്കറി വികസന തീവ്രയജ്ഞമായ ജീവനി നമ്മുടെ കൃഷി നമ്മുടെ ആരോഗ്യം പദ്ധതിയുടെ ഉദ്ഘാടനം കടുത്തുരുത്തി ബ്ലോക്ക് പഞ്ചായത്ത് പ്രസിഡന്റ് പത്മ ചന്ദ്രൻ നിർവഹിക്കും. ജില്ലാ പഞ്ചായത്തംഗങ്ങളായ അഡ്വ. കെ.കെ. രഞ്ജിത്ത്, മേരി സെബാസ്റ്റ്യൻ, കല്ലറ പഞ്ചായത്ത് വൈസ് പ്രസിഡന്റ് ജോണി തോട്ടുങ്കൽ, ആത്മ പ്രോജക്ട് ഡയറക്ടർ ഇ.വി. ജയമണി, കൃഷി ഡെപ്യൂട്ടി ഡയറക്ടർ സലോമി തോമസ്, കൃഷി അസിസ്റ്റന്റ് ഡയറക്ടർ സിബി തോമസ്, അസിസ്റ്റന്റ് എൻജിനീയർ മുഹമ്മദ് ഷരീഫ്, ഹരിതകേരളം മിഷൻ ജില്ലാ കോഓർഡിനേറ്റർ പി. രമേഷ്, കൃഷി ഓഫീസർ ജോസഫ് ജെഫ്രി, പറപ്പള്ളിച്ചാൽ പാടശേഖര സമിതിയംഗങ്ങൾ തുടങ്ങിയവർ പങ്കെടുക്കും.