കോട്ടയം: സോളർ പാനലുകൾ വഴി വൈദ്യുതിയുണ്ടാക്കാൻ ജില്ലയിൽ 1476 ടെറസുകൾ റെഡി! വീടുകളുടെ ടെറസുകളിൽ സോളാർ പാനൽ സ്ഥാപിച്ച് വൈദ്യുതി ഉത്പാദിപ്പിക്കുന്ന സൗര പദ്ധതിയിൽ തെരഞ്ഞെടുക്കപ്പെട്ടർക്ക് കെ.എസ്.ഇ.ബി സ്ഥിരീകരണ അറിയിപ്പുകൾ ഫോണിലേക്ക് അയച്ചു തുടങ്ങി. ജൂണോടെ പദ്ധതി നടപ്പാക്കും.

കോട്ടയം,​ പാലാ സർക്കിളുകളിൽ നിന്ന് ലഭിച്ച 25,​736 അപേക്ഷകരിൽ നിന്നാണ് അർഹരെ തെരഞ്ഞെടുത്തത്. അപേക്ഷകരെ നേരിൽക്കണ്ട് കെ.എസ്.ഇ.ബി ധാരണയിലെത്തിയിട്ടുണ്ട്. ടെറസിന്റെ വലിപ്പവും സ്ഥാപിക്കേണ്ട പാനലും ഉൾപ്പെടെയുള്ള കാര്യങ്ങളിലും ധാരണയായിട്ടുണ്ട്. മൂന്ന് കമ്പനികളിൽ ഏതെങ്കിലും ഒന്നിന്റെ പാനലാണ് ടെറസിൽ സ്ഥാപിക്കുക. ഏത് വേണമെന്ന് ഉടമയ്ക്ക് തീരുമാനിക്കാം.

ഇവയിലൊന്ന് തെരഞ്ഞെടുക്കാം

കെട്ടിടം ഉടമ പണം മുടക്കേണ്ട. വൈദ്യുതിയുടെ 10% കെട്ടിട ഉടമയ്ക്ക് . ഭൂരിപക്ഷവും ഇതിനാണ് താത്പര്യം പ്രകടിപ്പിച്ചത്.

കെട്ടിട ഉടമ മുതൽ മുടക്കേണ്ട. വൈദ്യുതി നിശ്ചിത വിലയ്ക്ക് കെട്ടിടം ഉടമയ്ക്ക് ബോർഡ് നൽകും. 25 വർഷത്തേയ്ക്കു വില കൂടില്ല

 കെട്ടിടഉടമയുടെ ചെലവിൽ പാനൽ സ്ഥാപിക്കാം. ഉപയോഗിച്ച ശേഷമുള്ള വൈദ്യുതി കെ.എസ്.ഇ.ബിക്ക് വിൽക്കാം

അർഹർ

കോട്ടയം സർക്കിൾ 799

പാലാ സർക്കിൾ -677

'' തെരഞ്ഞെടുത്ത മാതൃക സംബന്ധിച്ച് ഈ മാസം അവസാനത്തോടെ കരാറിൽ ഒപ്പിടും. അമ്പത് മെഗാവാട്ട് വൈദ്യുതിയാണ് ആദ്യഘട്ടം ഉത്പാദിപ്പിക്കുന്നത്''

കെ.എസ്.ഇ.ബി അധികൃതർ