പാലാ : ഇന്ത്യൻ ജനതയെ ഏകോപിപ്പിച്ച് നിറുത്തുന്ന വികാരമാണ് ഗാന്ധിജിയെന്നും ഗാന്ധിജിയെ മറക്കാനുള്ള ഏതു ശ്രമങ്ങളെയും ഇന്ത്യൻ ജനത തോൽപ്പിക്കുമെന്നും മാണി സി കാപ്പൻ എം.എൽ. എ പറഞ്ഞു. ഗാന്ധിജിയുടെ രക്തസാക്ഷിത്വദിനത്തോടനുബന്ധിച്ചു മഹാത്മാഗാന്ധി നാഷണൽ ഫൗണ്ടേഷൻ സംഘടിപ്പിച്ച 'ഗാന്ധിജിയുടെ പ്രസക്തി സമകാലിക ഇന്ത്യയിൽ' എന്ന സെമിനാറും ഗാന്ധിസ്മൃതിയും ഉദ്ഘാടനം ചെയ്യുകയായിരുന്നു അദ്ദേഹം. ഗാന്ധിതൊപ്പിയിട്ടാലോ ചർക്കയിൽ നൂൽനൂറ്റാലോ ഗാന്ധിജിയാവാൻ സാധിക്കുകയില്ല. ലോകം മുഴുവൻ ആരാധനയോടെ കാണുന്ന ഏക ഇന്ത്യൻ വ്യക്തിത്വം ഗാന്ധിജി മാത്രമാണ്. ഗാന്ധിജിയുടെ രക്തസാക്ഷിത്വം മറക്കാൻ ദേശാഭിമാനിയായ ഒരു ഇന്ത്യാക്കാരനും കഴിയില്ലെന്നും അദ്ദേഹം പറഞ്ഞു. എബി ജെ ജോസ് അദ്ധ്യക്ഷത വഹിച്ചു. വൈസ് ചെയർമാൻ ഡോ.സിന്ധുമോൾ ജേക്കബ്, സാബു എബ്രാഹം, അനൂപ് ചെറിയാൻ, ബിനു പെരുമന, ജസ്റ്റിൻ ജോർജ്, സുമിത മറിയം മാമ്മൻ എന്നിവർ പ്രസംഗിച്ചു.