വൈക്കം: വല്ലകം സെന്റ് മേരീസ് പള്ളിയിൽ പരിശുദ്ധ കന്യകാ മറിയത്തിന്റെയും വിശുദ്ധ അന്തോനീസിന്റെയും തിരുനാളിന് എറണാകുളം അങ്കമാലി അതിരൂപത ചാൻസലർ ഫാ. ജോസ് പൊള്ളയിൽ കൊടിയേറ്റി.
വികാരി ഫാ. സെബാസ്റ്റ്യൻ മാടശ്ശേരി സഹകാർമ്മികനായി. അൾത്താരയിൽ വച്ച് വെഞ്ചരിച്ച കൊടിക്കൂറ ആഘോഷപൂർവ്വം കൊടിമരചുവട്ടിലേക്ക് എഴുന്നള്ളിച്ചു. ട്രസ്റ്റിമാരായ ജോർജ്ജ് പഴേമഠം, അബ്രഹാം മങ്ങാട്ട്, വൈസ് ചെയർമാൻ സന്തോഷ് അറയ്ക്കപ്പറമ്പിൽ എന്നിവർ നേതൃത്വം നൽകി. 247 വനിതകളാണ് ഈ വർഷത്തെ തിരുനാൾ പ്രസദേന്തിമാർ എന്നത് പ്രത്യേകതയാണ്. ഫെബ്രുവരി 1 ന് വിശുദ്ധ അന്തോനീസിന്റെ തിരുനാൾ ആഘോഷിക്കും. വൈകിട്ട് 5 ന് നടക്കുന്ന തിരുനാൾ പാട്ടുകുർബാനയ്ക്ക് ഫാ. ഫിലിപ്പ് രാമച്ചനാട്ട്, ഫാ. റെൻസൻ പൊള്ളയിൽ എന്നിവർ മുഖ്യ കാർമ്മികരാകും. 2 ന് കന്യകാമറിയത്തിന്റെ തിരുനാൾ ആഘോഷിക്കും. വൈകിട്ട് 5 ന് നടക്കുന്ന തിരുനാൾ പാട്ടുകുർബാനയ്ക്ക് ഫാ. ബിബിൻ കുരിശുതറ മുഖ്യകാർമ്മികനാകും. ഫാ. ബിജു പെരുമായൻ അനുഗ്രഹപ്രഭാഷണം നടത്തും. തുടർന്ന് വടക്ക് ഭാഗത്തേക്ക് പ്രദക്ഷിണം പുറപ്പെടും. 3 ന് മരിച്ചവരുടെ ഓർമ്മദിനമായി ആചരിക്കും.