കൊല്ലം: അഞ്ചലിൽ കിടപ്പുരോഗികളുടെ പെൻഷനിൽ നിന്ന് പാർട്ടിക്കായി പിരിവ് നടത്തിയ പഞ്ചായത്ത് അംഗത്തെ സി.പി.ഐ സസ്‌പെൻഡ് ചെയ്തു. വാർഡംഗമായ വി.വൈ.വർഗീസിനെയാണ് പാർട്ടി പ്രാഥമിക അംഗത്വത്തിൽ നിന്ന് സസ്പെൻഡ് ചെയ്തത്. സംഭവത്തെക്കുറിച്ച് അന്വേഷിക്കാൻ പാർട്ടി മൂന്നംഗ സമിതിയെ നിയമിച്ചു.

അഞ്ചൽ പഞ്ചായത്തിലെ 25ഓളം കിടപ്പുരോഗികളിൽ നിന്ന് നിർബന്ധിത പണപ്പിരിവ് നടത്തിയെന്നാണ് പരാതി ഉയർന്നത്. തുച്ഛമായ ക്ഷേമപെൻഷനിൽ നിന്ന് 100 രൂപ വീതമാണ് പിരിച്ചത്. വനംമന്ത്രി കെ രാജുവിന്റെ മണ്ഡലത്തിലാണ് സംഭവം. പാർട്ടി പ്രവർത്തന ണ്ടിലേക്ക് എന്നുപറഞ്ഞാണ് 100 രൂപ പിടിച്ചതെന്ന് നാട്ടുകാർ പറഞ്ഞു.

കിടപ്പുരോഗികൾക്ക് വീടുകളിൽ ക്ഷേമപെൻഷൻ എത്തിക്കണമെന്നാണ് സർക്കാർ നിർദേശം. എന്നാൽ അഞ്ചൽ പഞ്ചായത്തിലെ പത്താംവാർഡിലെ കിടപ്പുരോഗികളോ, ബന്ധുക്കളോ അടുത്തുള്ള അംഗൻവാടിയിൽ എത്തി പണം കൈപ്പറ്റാനാണ് പഞ്ചായത്ത് അംഗം നിർദ്ദേശിച്ചത്. ഇത്തരത്തിൽ പണം വാങ്ങാൻ എത്തിയവർക്കാണ്, പെൻഷനിൽ നിന്നും 100 രൂപ എടുത്തശേഷം ബാക്കി തുക കൊടുത്തത്. പാർട്ടി പ്രവർത്തന ഫണ്ടിലേക്ക് 100 രൂപ എടുത്തതിന്റെ രസീതും ഇവർക്ക് നല്‍കിയിട്ടുണ്ട്. സംഭവത്തില്‍ പ്രതിഷേധിച്ച് നാട്ടുകാർ രംഗത്തെത്തിയതിന് പിന്നാലെയാണ് പാർട്ടി നടപടി.