കൊച്ചി: സംസ്ഥാനത്ത് പെട്രോൾ ഡീസൽ വില വീണ്ടും കുതിച്ചുയരുകയാണ്. ഒരു മാസത്തിനിടെ രണ്ടു രൂപയിലധികം വർദ്ധനയാണ് വിലയിൽ ഉണ്ടായത്. ഇന്ന് പെട്രോളിന് 10 പൈസയും, ഡീസലിന് 12 പൈസയും കൂടി. ഇറാനും അമേരിക്കയും തമ്മിലുള്ള സംഘർഷം ഇന്ധന വിലയെ ബാധിച്ചു എന്നാണ് വിലയിരുത്തൽ.

ഒരു ലിറ്റർ പെട്രോളിന് 77.57 രൂപയും, ഡീസലിന് 72.24 രൂപയുമാണ് ഇന്നത്തെ വില. ബ്രെൻഡ് ക്രൂഡോയിലിന് 68.60 ആണ് ഇന്നത്തെ നിരക്ക്. ആഗോള വിപണിയിൽ അസംസ്കൃത എണ്ണ വിലയും കൂടിയിട്ടുണ്ട്.

നിലവിലെ സാഹചര്യത്തിൽ ഇനിയും വില ഉയരാനാണ്‌ സാധ്യത. അമേരിക്ക ഇറാൻ സംഘർഷം എണ്ണ വിപണിയെ സാരമായി ബാധിക്കും എന്നാണ് കണക്കുകൂട്ടൽ. ലോകത്തെ എണ്ണ ശേഖരത്തിന്റെ പത്ത് ശതമാനത്തോളം ഇറാന്റെ കൈവശമാണ്. കഴിഞ്ഞ ഒരു മാസം പ്രതിദിനം 6.7 ദശലക്ഷം ബാരൽ ക്രൂഡ് ഓയിലാണ് ഇറാൻ ഇറാക്ക് രാജ്യങ്ങൾ മാത്രം ഉല്പാദിപ്പിച്ചത്.