കോഴിക്കോട്: പൗരത്വ നിയമഭേദഗതിയെ പിന്തുണച്ച് നടത്തുന്ന പ്രതിഷേധത്തിൽ പങ്കെടുക്കാൻ കേന്ദ്ര ആഭ്യന്തരമന്ത്രി അമിത് ഷാ എത്തുന്ന ദിവസം കറുത്ത മതിൽ ഒരുക്കി പ്രതിഷേധിക്കാനുള്ള തീരുമാനം യൂത്ത് ലീഗ് ഉപേക്ഷിച്ചു,. കോഴിക്കോട് ചേർന്ന് മുസ്ലിം ലീഗിന്റെ നേതൃയോഗം ഇക്കാര്യം യൂത്ത് ലീഗിനെ അറിയിക്കുകയായിരുന്നു. അമിത് ഷാ പാർട്ടി പരിപാടിയിൽ പങ്കെടുക്കാനാണ് വരുന്നത്. അന്ന് സമരം വേണ്ടെന്ന് യൂത്ത് ലീഗുമായി ആലോചിച്ച് തീരുമാനിക്കുകയായിരുന്നു. മറ്റ് ദിവസങ്ങളിൽ പ്രതിഷേധം സംഘടിപ്പിക്കാമെന്നും ലീഗ് നേതാക്കൾ പറഞ്ഞു. ഇക്കാര്യം യൂത്ത് ലീഗ് നേതാക്കളോട് അഭ്യര്‍ത്ഥിച്ചതായി പി.കെ. കുഞ്ഞാലിക്കുട്ടി, സയ്യിദ് ഹൈദരലി ശിഹാബ് തങ്ങൾ, ഇ.ടി. മുഹമ്മദ് ബഷീർ എന്നിവർ മാദ്ധ്യമങ്ങളോട് പറഞ്ഞു.
അമിത് ഷാ കേരളത്തിലെത്തുന്ന ദിവസം കറുത്ത മതിൽ ഒരുക്കി പ്രതിഷേധം തീർക്കുമെന്ന് യൂത്ത് ലീഗ് നേതാവ് പി കെ ഫിറോസാണ് രാവിലെ അറിയിച്ചത്. പറഞ്ഞത്. ബ്ലാക്ക് വാൾ പ്രതിഷേധം സംഘടിപ്പിക്കുമെന്നായിരുന്നു പ്രഖ്യാപനം. ജനുവരി 15ന് കറുത്ത വസ്ത്രം ധരിച്ച് സ്ത്രീകളും കുട്ടികളും അടക്കമുള്ളവർ റോഡിന് ഇരുവശവും പ്രതിഷേധ മതിൽ തീർക്കും. കരിപ്പൂർ വിമാനത്താവളം മുതൽ വെസ്റ്റ്ഹിൽ ഹെലിപ്പാഡ് വരെ 35 കിലോമീറ്റർ ദൂരത്തിലാണ് ബ്ലാക്ക് വാൾ തീർക്കുക. ഒരു ലക്ഷം പേർ പങ്കാളികളാകുമെന്നും പി.കെ. ഫിറോസ് അവകാശപ്പെട്ടിരുന്നു.