'മലരേ നിന്നെ കാണാതിരുന്നാൽ' എന്ന ഗാനം നമ്മൾ മറന്നുകാണില്ല. ജോർജും മലരും തകർത്തഭിനയിച്ച പ്രേമം എന്ന ചിത്രത്തിലെ സൂപ്പർ ഗാനം കൊണ്ട് മലയാളികയുടെ മനസ്സിൽ ഇടം നേടാൻ സായി പല്ലവിക്ക് കഴിഞ്ഞു. പിന്നിടങ്ങോട്ട് മലയാളത്തിലും തമിഴിലുമായി നിരവധി സൂപ്പർ ഹിറ്റുകൾ കൊണ്ട് സായി ആരാധകരുടെ ഹൃദയം കീഴടക്കി. എന്നാൽ അഭിനയം മാത്രമല്ല നൃത്തവും തനിക്ക് വഴങ്ങുമെന്ന് നിരവധി നൃത്ത രംഗങ്ങളിലൂടെ താരം തെളിയിച്ചിരുന്നു.

മാരി 2വിലെ ''റൗഡിബേബി"" എന്ന ഗാനത്തിനു വളരെയധികം ആരാധകരെ സമ്പാദിക്കാൻ സാധിച്ചു. മാരി 2 എന്ന ചിത്രത്തിലെ ഈ ഗാനത്തെ ഇത്രയേറെ പ്രിയപ്പെട്ടതാക്കിയത് ധനുഷിന്റെയും, സായിപല്ലവിയുടെയും നൃത്തചുവടുകളാണ്. ഇപ്പോഴിതാ സാരിയുടുത്തു റൗഡി ബേബിയുടെ വരികൾക്ക്, വീണ്ടും നൃത്തച്ചുവടുകൾ വച്ച് ആരാധകർക്ക് മുന്നിൽ വൈറലാവുകയാണ് സായി പല്ലവി. 'ബിഹൈൻഡ് വുഡ്' പുരസ്‌കാര വേദിയിലാണ് എല്ലാവരെയും ഞെട്ടിച്ചുകൊണ്ട് സായി നൃത്തം ചെയ്തത്. പ്രിയ താരത്തിന്റെ നൃത്തം ആവേശത്തോടെയാണ് കാണികൾ ഏറ്റെടുത്തത്.

അതിരൻ എന്ന സിനിമയിലെ അഭിനയത്തിനാണ് 'ക്രിട്ടിക് ചോയ്സ് ബെസ്റ്റ് ഫീമെയിൽ ആക്ടർ" അവാർഡ് സായിക്ക് ലഭിച്ചത്. പുരസ്ക്കാരം ഏറ്റുവാങ്ങാൻ വന്ന താരം അവതാരകയുടെ ആവശ്യപ്രകാരം ഡാൻസ് ചെയ്യുകയായിരുന്നു. സായി നൃത്തം ചെയ്തതോടെ വേദിയും സദസും ആവേശത്തിലായി. ധനുഷ്, നിവിൻ പോളി , മഞ്ജു വാര്യർ തുടങ്ങി നിരവധി താരങ്ങളുടെ മുന്നിലാണ് സായി നൃത്തം ചെയ്തത്. ഇതോടെ സായിയുടെ റൗഡി ബേബി വീണ്ടും സമൂഹ മാദ്ധ്യമങ്ങളിൽ വൈറലായിരിക്കുകയാണ്.