കൊച്ചി: ആഭരണ പ്രേമികളെ നിരാശരാക്കി സ്വർണവില ഇന്നലെ പുതിയ ഉയരം കുറിച്ചു. സംസ്ഥാനത്ത് പവൻ വില 520 രൂപ വർദ്ധിച്ച് 30,​400 രൂപയായി. ഗ്രാമിന് 65 രൂപ ഉയർന്ന് വില 3,​800 രൂപയിലെത്തി.

അമേരിക്ക-ഇറാൻ സം‍ഘർഷം യുദ്ധത്തിലേക്ക് നീങ്ങുമെന്ന പ്രതീതിയിൽ എത്തിയതോടെ,​ ഓഹരി വിപണികൾ തളരുന്നതും നിക്ഷേപകർ സ്വർണത്തിലേക്ക് ചേക്കേറുന്നതുമാണ് വിലക്കയറ്റത്തിന് കാരണം. രാജ്യാന്തര വിപണിയിൽ സ്വർണവില ഔൺസിന് ഇന്നലെ ഏഴുവർഷത്തെ ഉയരമായ 1,​610.90 ഡോളറിലെത്തി. ന്യൂഡൽഹി ബുളള്യൻ വിപണിയിൽ പത്തു ഗ്രാമിന് 615 രൂപ വർദ്ധിച്ച് വില സർവകാല റെക്കാഡായ 41,​278 രൂപയായി.

കേരളത്തിൽ പവന് ഈമാസം ഇതുവരെ 1,​400 രൂപയും ഒരുമാസത്തിനിടെ 2,​400 രൂപയും കൂടി. ഗ്രാമിന് 175 രൂപയാണ് ഈമാസം കൂടിയത്; ഒരുമാസത്തിനിടെ 300 രൂപയും.