മലയാള സിനിമയിലെ എക്കാലത്തെയും ഹിറ്റ് മേക്കേഴ്‌സ് ആണ് സിദ്ദിഖ് ലാൽ. റാംജി റാവ് സ്പീക്കിംഗ്, ഇൻ ഹരിഹർ നഗർ, ഗോഡ് ഫാദർ, വിയ്റ്റ്‌നാം കോളനി തുടങ്ങി ഇരുവരും ഒന്നിച്ചപ്പോൾ പിറന്നത് വമ്പൻ ഹിറ്റുകളായിരുന്നു. പിന്നീട് രണ്ട് വഴികളിലൂടെ സഞ്ചരിക്കാൻ തീരുമാനിച്ചപ്പോഴും സിദ്ദിഖും ലാലും തങ്ങളുടെതായ രീതിയിൽ മലയാള സിനിമയിൽ ശക്തമായ സാന്നിധ്യമായി. എന്നാൽ ആദ്യ തിരക്കഥ വമ്പൻ പരാജയമായിരുന്നുവെന്ന ചരിത്രം കൂടി പറയാനുണ്ട് സിദ്ദിഖ് ലാലിന്. 1986ൽ പുറത്തിറങ്ങിയ പപ്പൻ പ്രിയപ്പെട്ട പപ്പനാണ് ഇരുവരും ചേർന്നെഴുതിയ ആദ്യ തിരക്കഥ. റഹ്‌മാൻ നായകനായ ചിത്രത്തിൽ മോഹൻലാൽ ഒരു പ്രധാന കഥാപാത്രത്തെ അവതരിപ്പിച്ചിരുന്നു. എന്നാൽ വമ്പൻ പരാജയം നേരിടാനായിരുന്നു ചിത്രത്തിന്റെ വിധി. കേരളകൗമുദി ഓൺലൈനിന് നൽകിയ പ്രത്യേക അഭിമുഖത്തിൽ സിനിമയുടെ പരാജയകാരണം സിദ്ദിഖ് തന്നെ വെളിപ്പെടുത്തി.
'കാലത്തിന് വളരെ മുമ്പേ വന്ന സബ്‌ജക്‌ടായിരുന്നു പപ്പൻ പ്രിയപ്പെട്ട പപ്പന്റെത്. ഇതൊക്കെ നടക്കുന്നതാണോ എന്നായിരുന്നു അന്നത്തെ പ്രേക്ഷകന്റെ ചിന്ത. നടക്കുന്നതല്ല, നടക്കാൻ തോന്നിപ്പിക്കുന്നതാണ് സിനിമ. സത്യസന്ധമായതു മാത്രം കാണിക്കുപ്പോൾ അത് ഡോക്യമെന്ററിയായി പോവില്ലേ? ആ കാലഘട്ടത്തിൽ പപ്പനിലേതു പോലുള്ള ഒരു കോൺസപ്‌ട് സിനിമയിൽ വന്നിട്ടുണ്ടായിരുന്നില്ല. അതുമാത്രമല്ല, ആദ്യകാലത്തെ ഞങ്ങളുടെ എഴുത്തിന്റെ ഒരു പ്രാരാബ്‌ധതയും അതിലുണ്ടായിരുന്നു. അന്നത്തെ ചെറിയ ബഡ്‌ജറ്റിൽ എടുക്കേണ്ട സിനിമ ആയിരുന്നില്ല പപ്പൻ പ്രിയപ്പെട്ട പപ്പൻ'- സിദ്ദിഖിന്റെ വാക്കുകൾ.