ന്യൂഡൽഹി: പൗരത്വ ഭേദഗതി നിയമത്തിൽ പ്രതികരണവുമായി മൈക്രോസോഫ്റ്റ് സി.ഇ.ഒ സത്യ നാദെല്ല രംഗത്തെത്തി. നിയമത്തിനെതിരെ രാജ്യത്ത് പ്രതിഷേധം വ്യാപകമാകുന്നതിനിടെയാണ് നാദെല്ലയുടെ പ്രസ്താവന. ഇന്ത്യയിൽ നടക്കുന്ന കാര്യങ്ങൾ വളരെ മോശവും, ദുഖകരവുമായി കരുതുന്നു. ഇന്ത്യയിൽ ഇൻഫോസിസിന്റെ അടുത്ത സി.ഇ.ഒ ഒരു ബംഗ്ലാദേശ് കുടിയേറ്റക്കാരൻ ആകുന്നത് കാണാൻ ആഗ്രഹമുണ്ടെന്നും സത്യ നാദെല്ല പറഞ്ഞു. യു.എസിൽ നടന്ന മൈക്രോസോഫ്റ്റിന്റെ ഒരു പരിപാടിയിലാണ് നാദെല്ല അഭിപ്രയം വ്യക്തമാക്കിയത്.

Asked Microsoft CEO @satyanadella about India's new Citizenship Act. "I think what is happening is sad... It's just bad.... I would love to see a Bangladeshi immigrant who comes to India and creates the next unicorn in India or becomes the next CEO of Infosys" cc @PranavDixit

— Ben Smith (@BuzzFeedBen) January 13, 2020

ഓരോ രാജ്യവും അതിർത്തികൾ നിർവചിക്കുകയും,​ അതിനനുസരിച്ച് കുടിയേറ്റ നയം രൂപീകരിക്കുകയും ചെയ്യും. ദേശീയ സുരക്ഷ പരിരക്ഷിക്കുകയാണ് രാജ്യത്തിന്റെ ലക്ഷ്യമെന്ന് മൈക്രോസോഫ്റ്റ് ഇന്ത്യയുടെ ഔദ്യോഗിക ട്വീറ്ററിലൂടെ നാദെല്ല പ്രതികരിച്ചു. ജനാധിപത്യ രാജ്യങ്ങളിൽ, ജനങ്ങളും സർക്കാരുകളും ചർച്ച ചെയ്ത് നിർവചിക്കുന്നതാണ് ഇത്തരം തീരുമാനങ്ങൾ. വ്യത്യസ്ത സാംസ്കാരിക പാരമ്പര്യങ്ങളുള്ള ഇന്ത്യയിൽ ജനിച്ച് വളർന്ന വ്യക്തിയാണ് താനെന്നും,​ എന്നാൽ കുടിയേറ്റ ജീവിതത്തിന്റെ അനുഭവങ്ങൾ അമേരിക്കയിലാണെന്നും അദ്ദേഹം വ്യക്തമാക്കി. അതിനാൽ ഒരു കുടിയേറ്റക്കാരന് മികച്ച ഒരു തുടക്കം കണ്ടെത്താനും,​ ഇന്ത്യൻ സമ്പദ്‌വ്യവസ്ഥയ്ക്ക് വലിയ നേട്ടമുണ്ടാക്കുന്ന ബഹുരാഷ്ട്ര കമ്പനികളുമുള്ള ഒരു ഇന്ത്യയെക്കുറിച്ചാണ് തന്റെ പ്രതീക്ഷയെന്നും അദ്ദേഹം കൂട്ടിച്ചേർത്തു.

Statement from Satya Nadella, CEO, Microsoft pic.twitter.com/lzsqAUHu3I

— Microsoft India (@MicrosoftIndia) January 13, 2020

ഇന്ത്യയുടെ മൂന്ന് അയൽരാജ്യങ്ങളിലെ ന്യൂനപക്ഷ സമുദായങ്ങളിൽ നിന്നുള്ള കുടിയേറ്റക്കാർക്ക് പൗരത്വം നൽകുകയാണ് നിയമത്തിന്റെ ലക്ഷ്യം. ദേശീയ പൗരത്വ രജിസ്റ്റർ നടപ്പാക്കുമ്പോൾ രാജ്യത്തെ മുസ്‌ലിം പൗരന്മാരെ പുറത്താക്കുമെന്ന് ചിലർ കരുതുന്നു. ഭരണഘടനാവിരുദ്ധമെന്നാണ് നിയമത്തെ വിമർശകർ വിശേഷിപ്പിക്കുന്നതെന്നും അദ്ദേഹം വ്യക്തമാക്കി.