മാള: കൊച്ചുകടവിൽ ഒരു വീട്ടിലെ മൂന്ന് വാഹനങ്ങൾ കത്തിച്ച നിലയിൽ കണ്ടെത്തി. കൊച്ചുകടവ് പള്ളി ബസാർ മുളങ്ങത്ത് ഷാഹുൽ ഹമീദിന്റെ വാഹനങ്ങളാണ് കത്തിനശിച്ചത്. 28 ലക്ഷം വിലവരുന്ന കാറും അഞ്ച് ലക്ഷം രൂപയുടെ ബൈക്കും ഒരു സ്കൂട്ടറുമാണ് കത്തിനശിച്ചത്. പുലർച്ചെ മൂന്നരയോടെയാണ് സംഭവം.

ഷാഹുൽ ഹമീദ് കിടന്നിരുന്ന മുറിയോട് ചേർന്നാണ് വാഹനങ്ങൾ നിറുത്തിയിട്ടിരുന്നത്. വെളിച്ചം കണ്ടാണ് വീട്ടുകാർ പുറത്തിറങ്ങിയത്. വാഹനങ്ങൾ നിറുത്തിയ സ്ഥലത്ത് നിന്ന് എട്ട് മീറ്റർ ദൂരത്തിൽ ഇന്ധനം ഒഴിച്ചിട്ടുണ്ടായിരുന്നു. ഇവിടെ നിന്നാണ് തീ കൊളുത്തിയിരിക്കുന്നത്. മൂന്ന് വാഹനങ്ങളിലും ഇന്ധനം വേറെ ഒഴിച്ചിട്ടാണ് തീ കൊടുത്തിരിക്കുന്നത്. മാള പൊലീസ് സ്ഥലത്തെത്തി അന്വേഷണം നടത്തി.