മോസ്കോ: റഷ്യൻ പ്രസിഡന്റ് വ്ളാഡിമിർ പുടിന്റെ ഭരണഘടനയിൽ മാറ്റം കൊണ്ടുവരുമെന്ന് പ്രഖ്യാപനത്തിന് പിന്നാലെ പ്രധാനമന്ത്രി ദിമിത്രി മെദ്‌വദേവും അദ്ദേഹം നേതൃത്വം നൽകുന്ന സർക്കാരും രാജി വച്ചു. പുടിന്റെ സാന്നിധ്യത്തിലായിരുന്നു രാജിപ്രഖ്യാപനം. തന്റെ നേതൃത്വത്തിലുള്ള സർക്കാർ രാജിവെച്ചതായി റഷ്യൻ പ്രധാനമന്ത്രി അറിയിച്ചു.
റഷ്യയിലെ ദേശീയ ടെലിവിഷൻ വഴിയാണ് പ്രധാനമന്ത്രിയുടെ പ്രഖ്യാപനം. ഭരണഘടനയിൽ മാറ്റങ്ങൾ വരുത്തുമെന്നു വാർഷിക പ്രസംഗത്തിൽ വ്‌ളാഡിമിര്‍ പുടിൻ പറഞ്ഞതിനു തൊട്ടുപിന്നാലെയാണ് രാജി പ്രഖ്യാപനം. പുടിൻ രാജി സ്വീകരിച്ചതായാണ് പുറത്തുവരുന്ന റിപ്പോർട്ടുകൾ. മെദ്‌വദേവിനെ റഷ്യൻസുരക്ഷാ കൗണ്‍സില്‍ ഡെപ്യൂട്ടി ഡയരക്ടറായി നിയമിക്കുമെന്ന് പുടിന്‍ പറഞ്ഞു. നമ്മുടെ കൂട്ടായ പ്രവർത്തനങ്ങൾക്ക് എല്ലാ സഹകരണവും നൽകിയ സർക്കാരിന് ഞാൻ നന്ദി അറിയിക്കുന്നു. നമ്മൾ ഒരുമിച്ച് നേടിയ ഫലങ്ങൾക്ക് സംതൃപ്തി പ്രകടിപ്പിക്കാൻ ഞാൻ ആഗ്രഹിക്കുന്നു. എല്ലാം ചെയ്തിട്ടില്ല, പക്ഷേ എല്ലാം ഒരിക്കലും പൂർണ്ണമായി പ്രവർത്തിക്കുന്നില്ല- പുടിൻ കൂട്ടിച്ചേർത്തു. 2024 ൽ പുടിൻ വിരമിക്കുന്നതോടെ പ്രസിഡന്റിന്റെ അധികാരങ്ങൾ പരിമിതപ്പെടുത്താനാണു പുതിയ നീക്കം.