മുംബയ്: ക്രിക്കറ്റിൽ ധോണി യുഗം അവസാനിക്കുന്നുവോ എന്ന ചോദ്യമാണ് ഇപ്പോൾ ആരാധകർക്കിടയിൽ ഉയരുന്നത്. ബി.സി.സി.ഐയുടെ വാര്‍ഷിക കരാറിൽ നിന്നും മഹേന്ദ്ര സിംഗ് ധോണി പുറത്തായിരിക്കുന്നു. കഴിഞ്ഞവര്‍ഷം ജൂലായ് മുതല്‍ അവധിയില്‍ തുടരുകയാണ് മുന്‍ ഇന്ത്യന്‍ നായകന്‍ ധോണി. 2019 ലോകകപ്പ് സെമിയില്‍ ന്യൂസിലാന്‍ഡിന് എതിരെയാണ് ധോണി അവസാനമായി പാഡ് അണിഞ്ഞത്. അന്ന് 18 റണ്‍സിന് ഇന്ത്യ തോറ്റു. ലോകകപ്പില്‍ നിന്നും പുറത്തായി. തുടര്‍ന്ന് ഇന്ത്യയുടെ ഓരോ പരമ്പരയില്‍ നിന്നും ധോണി സ്വമേധയാ പിന്മാറുകയാണ്.
ധോണി വിരമിച്ചേക്കുമെന്ന് പലകുറി അഭ്യൂഹങ്ങൾ ഉയർന്നെങ്കിലും ഇക്കാര്യത്തിലും സ്ഥിരീകരണമില്ലായിരുന്നു. ഇതിനിടെയാണ് വാർഷിക കരാറിൽനിന്ന് ധോണിയെ പുറത്താക്കിയത്. ബി.സി.സി.ഐ ഇന്ത്യന്‍ താരങ്ങളുടെ പുതിയ കരാര്‍ പട്ടികയില്‍ ധോണിക്ക് സ്ഥാനമില്ല. ഏഴു കോടി രൂപ വാര്‍ഷിക വരുമാനമുള്ള എ പ്ലസ് ഗ്രേഡില്‍ വിരാട് കൊഹ്‌ലിയും, രോഹിത് ശര്‍മ്മയും, ജസ്പ്രീത് ബുംറയും മാത്രമാണ് ഉള്‍പ്പെട്ടിരിക്കുന്നത്. കരാര്‍ പട്ടികയില്‍ നിന്ന് കൂടി പുറത്തായതോടെ താരം ഇനി വിരമിക്കലിലേക്ക് നീങ്ങുമെന്നാണ് സൂചന.
എ ഗ്രേഡില്‍ ആര്‍ അശ്വിന്‍, രവീന്ദ്ര ജഡേജ, ഭുവനേശ്വര്‍ കുമാര്‍, ചേതേശ്വര്‍ പൂജാര, അജിങ്ക്യ രഹാനെ, കെ.എല്‍ രാഹുല്‍, ശിഖര്‍ ധവാന്‍, മുഹമ്മദ് ഷമി, ഇഷാന്ത് ശര്‍മ്മ, കുല്‍ദീപ് യാദവ്, ഋഷഭ് പന്ത് എന്നിവര്‍ ഇടം നേടി. 11 താരങ്ങള്‍ ഉള്‍പ്പെട്ട എ ഗ്രേഡില്‍ അഞ്ചു കോടി രൂപയാണ് വാര്‍ഷിക വരുമാനം. 2019 ഒക്ടോബര്‍ മുതല്‍ 2020 സെപ്തംബര്‍ വരെയാണ് കരാര്‍ കാലാവധി. ബി.സി.സി.ഐ വാര്‍ഷിക കരാര്‍ പട്ടിക ചുവടെ.
-ഗ്രേഡ് എ പ്ലസ് (ഏഴു കോടി രൂപ): വിരാട് കൊഹ്‌ലി, രോഹിത് ശര്‍മ്മ, ജസ്പ്രീത് ബുംറ.
-ഗ്രേഡ് എ (അഞ്ചു കോടി രൂപ): രവിചന്ദ്രന്‍ അശ്വിന്‍, രവീന്ദ്ര ജഡേജ, ഭുവനേശ്വര്‍ കുമാര്‍, ചേതേശ്വര്‍ പൂജാര, അജിങ്ക്യ രഹാനെ, കെഎല്‍ രാഹുല്‍, ശിഖര്‍ ധവാന്‍, മുഹമ്മദ് ഷമി, ഇഷാന്ത് ശര്‍മ്മ, കുല്‍ദീപ് യാദവ്, റിഷഭ് പന്ത്.
-ഗ്രേഡ് ബി (മൂന്നു കോടി രൂപ): വൃദ്ധിമാന്‍ സാഹ, ഉമേഷ് യാദവ്, യുസ്‌വേന്ദ്ര ചാഹല്‍, ഹാര്‍ദിക് പാണ്ഡ്യ, മായങ്ക് അഗര്‍വാള്‍
-ഗ്രേഡ് സി (ഒരു കോടി രൂപ): കേദാര്‍ ജാദവ്, നവ്ദീപ് സെയ്‌നി, ദീപക് ചഹാര്‍, മനീഷ് പാണ്ഡെ, ഹനുമാ വിഹാരി, ശാര്‍ദ്ധുല്‍ താക്കൂര്‍, ശ്രേയസ് അയ്യര്‍, വാഷിങ്ടണ്‍ സുന്ദര്‍.