ക്യാൻസറിന്റെ തീവ്രവേദനയിലും മനസുനിറഞ്ഞ് ചിരിക്കാനായിരുന്നു അനുവിനിഷ്ടം. ടിക് ടോക്കിലൂടെ സ്വയം ചിരിച്ചും,​ ചുറ്റുമുളളവരെ ചിരിപ്പിച്ചും ക്യാൻസർ രോഗത്തിന്റെ വേദനകളെ മറന്ന അനു സുരേന്ദ്രൻ (സുധി)​ മരണത്തിന് കീഴടങ്ങി. മരണശേഷവും അനുവിനെ ടിക് ടോക്ക് പ്രമികൾ മറന്നിട്ടില്ല. അനുവിന്റെ പ്രൊഫൈലിലെ വീഡിയോകളിൾ ലൈക്കും ഷെയറും പൂക്കൾ പോലെ അർപ്പിക്കുകയാണ് സുഹൃത്തുക്കൾ.

ഒൻപതുമാസം മുമ്പാണ് അനുവിന് ക്യാൻസർ രോഗം സ്ഥിരീകരിക്കുന്നത്. ജീവിതത്തിന്റെ സന്തോഷത്തിനിടയിൽ വിളിക്കാതെ കയറിവന്ന അതിഥിയെ അനു ധീരതയോടെ നേരിട്ടു. കീമോതെറാപ്പിയുടെ തീവ്രവേദന ഉള്ളിൽ സഹിച്ചാണ് തന്റെ എട്ടു വയസുള്ള മകനൊപ്പം അനു ആദ്യമായി ടിക് ടേക്കിൽ പ്രത്യക്ഷപ്പെടുന്നത്. എന്നാൽ പലരും അനുവിന്റെ രോഗാവസ്ഥയെക്കുറിച്ച് അറി‌ഞ്ഞത് പോലുമില്ല. കീമോതെറാപ്പിയിലൂടെ മുടി നഷ്ടപ്പെട്ട് മൊട്ടതലയുമായി അനു ടിക് ടോക്കിൽ നിറഞ്ഞു. ഒരുദിവസംപോലും രോഗത്തിന്റെ പേരിൽ അനു കരഞ്ഞിരുന്നില്ല. ജീവിതം കൈവിട്ട് പോകുമ്പോഴും തളരാതെ ചിരിയോടെ നേരിടുകയായിരുന്നു അനു.

ടിക് ടോക്ക് വഴി പരിചയപ്പെട്ട നിരവധിപേർ മരണമറിഞ്ഞ് അനുവിന്റെ വീട്ടിലേക്ക് വന്നുകൊണ്ടിരിക്കുകയാണ്. അനുവിന് ടിക് ടോക്കിൽ 522 വീഡിയോകളും 83300 ഫോളോവേഴ്സും ഉണ്ട് . അർബുദം സ്ഥിരീകരിച്ച ശേഷമാണ് എല്ലാ വീ‌ഡിയോകളും അനു ചെയ്തിട്ടുള്ളത്.

രോഗം ഭേദമായി വീട്ടിലേക്ക് താൻ മടങ്ങിവരുമെന്ന ഉറച്ച ആത്മവിശ്വാസത്തിലായിരുന്നു അനു. താൻ ചികിത്സയിലാണെന്നും മടങ്ങി വന്ന് ഒന്നിച്ച് കാണാമെന്നും ബന്ധുക്കളോടും സുഹൃത്തുക്കളോടും അനു പറ‌ഞ്ഞിരുന്നു. മരിക്കുന്നതിന് ദിവസങ്ങൾക്ക് മുമ്പ് തന്റെ ജീവിതയാത്ര അനു ചിത്രങ്ങളിലൂടെ തന്നെ സ്നേഹിക്കുന്നവ‌ക്ക് കാട്ടിക്കൊടുത്തു. കുട്ടികാലം മുതലുള്ള ചിത്രങ്ങൾ കൂട്ടിതുന്നിയ വീഡിയോയായിരുന്നു അത്. എല്ലാ ചിരികളും ഓർമകളാക്കി അനു തൊട്ടടുത്ത ദിവസം തന്നെ യാത്രയായി. തങ്ങളുടെ പ്രിയപ്പെട്ടവൾ ഇനി വീഡിയോകളിലൂടെ ജീവിക്കുമെന്നാണ് എല്ലാവരുടെയും നിറഞ്ഞ പ്രതീക്ഷ.