മംഗളൂരു: മംഗളൂരു അന്താരാഷ്ട്ര വിമാനത്താവളത്തിൽ നിന്ന് ഉഗ്ര സ്ഫോടകശേഷിയുള്ള ബോംബ് കണ്ടെത്തി. എയർട്രാഫിക് മാനേജരുടെ കൗണ്ടറിന് സമീപത്ത് ഉപേക്ഷിക്കപ്പെട്ട ബാഗിനുള്ളിൽ ഇന്ന് രാവിലെയാണ് ബോംബ് കണ്ടെത്തിയത്. ഉപേക്ഷിച്ച ബാഗ് സി.ഐ.എസ്.എഫിന്റെ ശ്രദ്ധയിൽപ്പെട്ടതോടെയാണ് ബോംബ് കണ്ടത്. തുടർന്ന് ബോംബ് നിർവീര്യമാക്കുന്നതിന്റെ ഭാഗമായി വിമാനത്താവളത്തിനു പുറത്തേക്ക് മാറ്റി. വിമാനത്താവളത്തിൽ അതീവജാഗ്രതാ നിർദേശം നൽകി.

അതേസമയം, ബോംബ് കണ്ടെത്തിയത് സർവീസിനെ ബാധിച്ചിട്ടില്ല. അഞ്ഞൂറ് മീറ്ററിനുള്ളിൽ ആഘാതം ഏൽപ്പിക്കാനാവുന്ന ഉഗ്രശേഷിയുള്ള ബോംബാണ് കണ്ടെത്തിയതെന്ന് അധികൃതർ അറിയിച്ചു. ആട്ടോറിക്ഷയിൽ വിമാനത്താവളത്തിൽ എത്തിയ ഒരാളാണ് ബാഗ് കൊണ്ടുവച്ചതെന്നാണ് വിവരം.