ആഗ്ര: 60കാരിയും 22 വയസ്സുള്ള യുവാവുമായുള്ള പ്രണയത്തെത്തുടർന്ന് സംഘർഷഭരിതമായി പൊലീസ് സ്റ്റേഷൻ. ഉത്തർപ്രദേശിലെ ആഗ്രയിലെ പ്രകാശ് നഗറിലാണ് സംഭവം. സ്ത്രീയുടെ ഭർത്താവും മകനും പൊലീസ് സ്റ്റേഷനിലെത്തി യുവാവിനെതിരെ പരാതി നൽകാനെത്തിയതോടെയാണ് നാടകീയ സംഭവം പുറത്തു വരുന്നത്. ഈ സമയം യുവാവും കുടുംബസമേതം പൊലീസ് സ്റ്റേഷനിലെത്തിയിരുന്നു. ഏഴ് കുട്ടികളുടെ അമ്മയും ഏഴ് കുട്ടികളുടെ അമ്മൂമ്മയുമാണ് സ്ത്രീ.

ഇരുകൂട്ടരും തമ്മിൽ സ്റ്റേഷനിൽ വച്ച് സംഘർഷമുണ്ടായി. അവിടെ വച്ച് 60കാരിയും യുവാവും വിവാഹിതരാകാൻ താൽപര്യപ്പെടുന്നു എന്ന് പൊലീസിനെ അറിയിച്ചു. രണ്ടു പേരുടെയും വീട്ടുകാർ ഇതോടെ ഇവർക്കെതിരെ തിരഞ്ഞു. ഈ ബന്ധം ഒരിക്കലും അംഗീകരിക്കാനാകില്ലെന്നായിരുന്നു അവരുടെ നിലപാട്.

പൊലീസുകാരും കമിതാക്കളോട് നിങ്ങളുടെ മനസ് മാറ്റാൻ ആവശ്യപ്പെട്ടു. എന്നാൽ ഇതൊന്നും അവർ വകവച്ചില്ല. പിന്നീട് പ്രശ്നം പരിഹരിക്കാമെന്ന ധാരണയിൽ താല്‍കാലികമായി ഇരുവരെയും കുടുംബങ്ങളോടൊപ്പം പറഞ്ഞുവിട്ടു. പ്രദേശത്തെ സമാധാനം നഷ്ടപ്പെടുത്തിയതിന് 22കാരനെതിരെ പൊലീസ് കേസെടുത്തിട്ടുണ്ട്.