ന്യൂഡൽഹി :കോടതിയും സർക്കാരും കുറ്റവാളികൾക്കൊപ്പമാണ് നിൽക്കുന്നതെന്ന് നിർഭയയുടെ അമ്മ ആശാദേവി.. പ്രതികൾക്ക് വധശിക്ഷ നടപ്പാക്കാനുള്ള പോരാട്ടം തുടരുമെന്നും അവർ പറഞ്ഞു. വധശിക്ഷ നടക്കില്ലെന്ന് പ്രതികൾ വെല്ലുവിളിക്കുകയാണ്.. ഇവർക്ക് ശിക്ഷ നൽകിയില്ലെങ്കിൽ ഭരണഘടന തന്നെ കത്തിച്ചുകളയണമെന്നും നിർഭയയുടെ അമ്മ ആശാദേവി പറഞ്ഞു.

നിർഭയ കേസിലെ പ്രതികളുടെ വധശിക്ഷ നടപ്പാക്കുന്നത് നീട്ടിക്കൊണ്ടുള്ള പട്യാലകോടതി വിധി വന്നതിന് പിന്നാലെ പൊട്ടിക്കരഞ്ഞുകൊണ്ടാണ് ആശാദേവി മാദ്ധ്യമങ്ങളോട് പ്രതികരിച്ചത്. ഈ നാട്ടിൽ പെൺകുട്ടികൾക്ക് ഒരു വിലയുമില്ലെന്ന് അവർ പറഞ്ഞു. പ്രതികൾ നിയമ വ്യവസ്ഥയെ പരിഹസിക്കുകയാണ്. ഈ വ്യവസ്ഥയിൽ വിശ്വാസമില്ലെന്നും ആശാദേവി കൂട്ടിച്ചേർത്തു.

ഇനി ഒരു ഉത്തരവ് ഉണ്ടാകുന്നതെ വരെ നിർഭയ കേസിലെ പ്രതികളുടെ വധശിക്ഷയ്ക്ക് സ്‌റ്റേ നല്‍കുന്നു എന്നാണ് ജഡ്ജി പറഞ്ഞത്. വധശിക്ഷയ്ക്ക് എതിരെ കേസിലെ പ്രതിയായ വിനയ് ശർമ്മ നല്‍കിയ ഹര്‍ജിയിലാണ് ഡൽഹി പട്യാല കോടതിയുടെ നടപടി. വധശിക്ഷ നടപ്പാക്കാനുള്ള ഒരുക്കങ്ങൾ തിഹാർ ജയിലിൽ നടക്കുന്നതിനിടെയാണ് കോടതിയുടെ ഉത്തരവ്.