ന്യൂഡൽഹി: സാമ്പത്തിക ശാസ്‌ത്രം ഒരാളുടെ ദൈനംദിന ജീവിതത്തെ അറിഞ്ഞോ അറിയാതെയോ ബാധിക്കുന്നുണ്ടെന്ന് വ്യക്തമാക്കാൻ ഇക്കുറി സാമ്പത്തിക സർവേയിൽ ധനമന്ത്രാലയം 'താലിനോമിക്‌സ്" എന്ന സിന്താന്തം ഉൾപ്പെടുത്തിയത് കൗതുകമായി. ഭക്ഷണത്തിനായി ഒരാൾ ഒരുവർഷം ചെലവഴിക്കുന്ന തുക കുറഞ്ഞുവെന്ന് ചൂണ്ടിക്കാട്ടുകയാണ് ഇതിലൂടെ സർക്കാർ ചെയ്‌തത്.
25 സംസ്ഥാനങ്ങളിലെ 80 കേന്ദ്രങ്ങളിലുള്ള വ്യവസായ മേഖലയിലെ തൊഴിലാളികളിൽ നിന്ന് വിവരശേഖരണം നടത്തിയാണ് താലിനോമിക്‌സ് സിദ്ധാന്തം തയ്യാറാക്കിയത്. താലി ഊണ് കഴിക്കാൻ ചെലവേറിയോ കുറഞ്ഞോ എന്ന് കണ്ടെത്തുകയായിരുന്നു ഉദ്ദേശ്യം. ധാന്യങ്ങളും സബ്‌ജിയും പരിപ്പും (ദാൽ) അടങ്ങിയ വെജിറ്രേറിയൻ താലി ഊണും ദാലിന് പകരം മത്സ്യമാംസാദികൾ അടങ്ങിയ നോൺ-വെജ് താലി ഊണും സർവേയ്ക്കായി പരിഗണിച്ചു.
ഇന്ത്യയെ ദക്ഷിണ, ഉത്തര, പൂർവ, പശ്‌ചിമ മേഖലകളായി തിരിച്ചായിരുന്നു സർവേ. നാല് മേഖലകളിലും 2015-16 മുതൽ 2019-20 വരെയുള്ള കാലയളവിൽ താലി ഊണിന്റെ വില കുറഞ്ഞുവെന്ന് സർവേ കണ്ടെത്തി. ദിവസവും രണ്ടു വെജിറ്രേറിയൻ താലി ഊണ് വീതം കഴിക്കുന്ന ഒരു അഞ്ചംഗ കുടുംബം, വില കുറഞ്ഞതിലൂടെ പ്രതിവർഷം 10,887 രൂപ ലാഭിച്ചു. നോൺ-വെജ് താലി ഊണ് കഴിക്കുന്ന കുടുംബത്തിന്റെ നേട്ടം 11,787 രൂപയാണ്.
2015-16 കാലയളവിൽ വെജ് കുടുംബം താലി ഊണ് വിലയിൽ 29 ശതമാനവും നോൺ-വെജ് കുടുംബം 18 ശതമാനവും ലാഭം ചെലവിൽ നേടി. കാർഷികോത്‌പാദനം വർദ്ധിപ്പിക്കാൻ 2014-15ലെ ബഡ്‌ജറ്ര് മുതൽ കേന്ദ്ര സർക്കാർ സ്വീകരിച്ച നടപടികളാണ് വിലക്കുറവിന്റെ നേട്ടത്തിലേക്ക് ഇന്ത്യൻ കുടുംബങ്ങളെ നയിച്ചതെന്ന് സാമ്പത്തിക സർവേ അഭിപ്രായപ്പെട്ടു. കാർഷികോത്പന്ന വിപണി സുതാര്യമാക്കാനെടുത്ത നടപടികളും ഫലം കണ്ടു.
2018-19ലെ ജി.ഡി.പി വളർച്ച
വെട്ടിക്കുറച്ച് കേന്ദ്രം
വളർന്നത് 6.1% മാത്രം
കഴിഞ്ഞ സാമ്പത്തിക വർഷത്തെ (2018-19) ജി.ഡി.പി വളർച്ചാ നിരക്ക് കേന്ദ്ര സർക്കാർ നേരത്തേ വിലയിരുത്തിയ 6.8 ശതമാനത്തിൽ നിന്ന് 6.1 ശതമാനത്തിലേക്ക് വെട്ടിക്കുറച്ചു. സമ്പദ്‌വ്യവസ്ഥയുടെ നെടുംതൂണുകളായ മാനുഫാക്‌ചറിംഗ്, ഖനന മേഖലകളുടെ തളർച്ചയാണ് വളർച്ചാ കൂടുതൽ താഴാൻ ഇടയാക്കിയത്. 2017-18ലെ വളർച്ച 7.2 ശതമാനത്തിൽ നിന്ന് ഏഴ് ശതമാനമായും കുറച്ചിട്ടുണ്ട്.
2017-18 സാമ്പത്തിക വർഷം പ്രതി ഓഹരി വരുമാനം 1,15,293 രൂപാണ്. 2018-19ൽ 1,26,521 രൂപയും. 139.81 ലക്ഷം കോടി രൂപയാണ് 2018-19ലെ ജി.ഡി.പി മൂല്യം. 2017-18ൽ ഇത് പരിഷ്‌കരിച്ച കണക്കുപ്രകാരം 131.75 ലക്ഷം കോടി രൂപയാണ്.
നടപ്പു സാമ്പത്തിക വർഷം വളർച്ചാ നിരക്ക് 11 വർഷത്തെ താഴ്‌ചയായ അഞ്ചു ശതമാനത്തിലേക്ക് ഇടിയുമെന്ന് ധനമന്ത്രാലയം ഇന്നലെ പാർലമെന്റിൽ സമർപ്പിച്ച സാമ്പത്തിക സർവേ റിപ്പോർട്ട് സൂചിപ്പിച്ചിട്ടുണ്ട്. 2020-21ൽ വളർച്ച ആറ് മുതൽ 6.5 ശതമാനം വരെ മെച്ചപ്പെട്ടേക്കുമെന്നും റിപ്പോർട്ടിലുണ്ട്.
ജി.ഡി.പി വളർച്ച
2015-16 : 8%
2016-17 : 8.2%
2017-18 : 7%
2018-19 : 6.1%
2019-20 : 5% (പ്രതീക്ഷ)