മലപ്പുറം: വനിതാകമ്മിഷൻ അംഗം ഷാഹിദ കമാലിനോട് അപമര്യാദയായി പെരുമാറിയ ആട്ടോഡ്രൈവർ വനിതാ കമ്മിഷൻ സിറ്റിംഗിൽ ഹാജരായി മാപ്പപേക്ഷ നൽകി. ഇന്നലെ ജില്ലാ പഞ്ചായത്ത് ഹാളിൽ ഷാഹിദ കമാൽ അടക്കമുള്ള കമ്മിഷൻ അംഗങ്ങൾ നടത്തിയ സിറ്റിംഗിലാണ് ആട്ടോഡ്രൈവർ അസ്കറലി മാപ്പപേക്ഷ നൽകിയത്. പൊലീസ് കേസെടുത്ത സാഹചര്യത്തിൽ വിഷയം വിശദമായി പരിശോധിച്ചശേഷം തുടർനടപടികൾ സ്വീകരിക്കും. ഇത് മറ്റുള്ളവർക്ക് കൂടി പാഠമാകണമെന്നും കമ്മിഷൻ അംഗം ഇ.എം. രാധ പറഞ്ഞു.

വ്യക്തിപരമായ വിഷയമായല്ല, സാമൂഹിക പ്രശ്നമായാണ് ഇതിനെ സമീപിച്ചതെന്ന് ഷാഹിദ കമാൽ പറഞ്ഞു. ആട്ടോ ഡ്രൈവർമാർക്ക് പെർമിറ്റ് നൽകും മുമ്പ് ആവശ്യമായ ബോധവത്കരണം നൽകാൻ ട്രാൻസ്‌പോർട്ട് കമ്മിഷണർക്ക് കത്ത് നൽകും. അങ്ങാടിപ്പുറം റെയിൽവേ സ്റ്റേഷനിലെ ആട്ടോഡ്രൈവർമാർക്ക് ആർ.ടി.ഒയുടെ നേതൃത്വത്തിൽ ബോധവത്കരണ ക്ലാസ് നൽകാനും നിർദ്ദേശിച്ചു.