പാലക്കാട്: ഭരണഘടനയുടെ മഹത്വവും മൂല്യവും ഉയർത്തിപ്പിടിച്ചുകൊണ്ടുള്ള സംസ്ഥാന സാക്ഷരതാ മിഷന്റെ കീഴിൽ സംഘടിപ്പിക്കുന്ന കലാജാഥക്ക് ജില്ലയിൽ സ്വീകരണം നൽകി. പൊതുവിദ്യാഭ്യാസ വകുപ്പ്, സംസ്ഥാന സാക്ഷരതാ മിഷൻ അതോറിറ്റി, ജില്ലാ സാക്ഷരതാ മിഷൻ എന്നിവയുടെ ആഭിമുഖ്യത്തിൽ സംഘടിപ്പിക്കുന്ന ഭരണഘടനാ സാക്ഷരത പദ്ധതിയായ ഇന്ത്യ എന്ന റിപ്പബ്ലിക് പരിപാടിയുടെ ഭാഗമായാണ് കലാജാഥ ജില്ലയിലെത്തിയത്. ജില്ലാ പഞ്ചായത്ത് പ്രസിഡന്റ് അഡ്വ. കെ.ശാന്തകുമാരി കലാജാഥ ഉദ്ഘാടനം ചെയ്തു.

തൃശ്ശൂർ ഫോക് തിയേറ്റർ ഗ്രൂപ്പായ ജനതയാണ് പരിപാടികൾ അവതരിപ്പിക്കുന്നത്. മനുഷ്യൻ മതങ്ങളെ സൃഷ്ടിച്ചു എന്ന വയലാർ ഗാനം പാടുകയും പാടി തീരുന്നതിനകം അംബേദ്കറുടെ ചിത്രം വരയ്ക്കുകയും ചെയ്തുകൊണ്ടാണ് കലാപരിപാടി ആരംഭിച്ചത്. തുടർന്ന് ഭരണഘടനയുടെ മഹത്വം ഉദ്‌ഘോഷിക്കുന്ന ദൃശ്യാവിഷ്‌കാരങ്ങൾ, ഡോ. സി.രാവുണ്ണിയുടെ ഇത് നമ്മുടെ റിപ്പബ്ലിക് എന്ന ഗാനം, ഗാന്ധിജിയുടെ ജീവിതവും സമരവും ആവിഷ്‌കരിക്കുന്ന സാഗ ഓഫ് മഹാത്മയുടെ ദൃശ്യാവിഷ്‌കാരം, എൻ.എസ് മാധവന്റെ മുംബൈ എന്ന കഥയെ അടിസ്ഥാനമാക്കിയുള്ള തീയേറ്റർ സ്‌കെച്ച്, സുഗതകുമാരിയുടെ ഗാന്ധാരി വിലാപം എന്ന കവിതയുടെ ദൃശ്യാവിഷ്‌കാരം, ജോസഫിന്റെ റേഡിയോ എന്ന ഏകപാത്ര നാടകം തുടങ്ങിയ പരിപാടികളാണ് മേളയിൽ അവതരിപ്പിച്ചത്.

പാട്ടുപാടി ചിത്രം വരച്ച കാർത്തികേയൻ ഏങ്ങണ്ടിയൂർ, ജാഥാ ക്യാ്ര്രപൻ അഡ്വക്കേറ്റ് വി. ഡി. പ്രേം പ്രസാദ് എന്നിവരെ ജില്ലാ പഞ്ചായത്ത് പ്രസിഡന്റ് പൊന്നാടയണിയിച്ച് ആദരിക്കുകയും ചിത്രം ജില്ലാപഞ്ചായത്തിനു വേണ്ടി ഏറ്റുവാങ്ങുകയും ചെയ്തു. ഗാന്ധിജിയുടെ രക്തസാക്ഷി ദിനമായ 30ന് തിരുവനന്തപുരത്ത് കലാജാഥ സമാപിക്കും.

ജില്ലാ പഞ്ചായത്തംഗം ദേവി, സാക്ഷരതാ മിഷൻ ജില്ലാ കോഓർഡിനേറ്റർ ദീപ ജെയിംസ്, പാർവ്വതി, ബഷീർ, വിജയൻ, ഏലിയാമ്മ എന്നിവർ സംസാരിച്ചു.

ഫോട്ടോ 3: ഇന്ത്യ എന്ന റിപ്പബ്ലിക് കലാജാഥ ജില്ലാ പഞ്ചായത്ത് പ്രസിഡന്റ് അഡ്വ. കെ. ശാന്തകുമാരി ഉദ്ഘാടനം ചെയ്യുന്നു