ഭോപ്പാൽ: മദ്ധ്യപ്രദേശിലെ ഇൻഡോറിൽ പുതുവത്സര ആഘോഷത്തിനിടെ ലിഫ്റ്റ് തകർന്ന് വീണ് ആറ് പേര്‍ മരിച്ചു. നിരവധി പേർക്ക് പരിക്കേറ്റു. ഇവരെ ആശുപത്രിയിൽ പ്രവേശിപ്പിച്ചു. ഇൻഡോറിലെ പ്രമുഖ വ്യവസായി പുനീത് അഗർവാളിന്റെ ഫാം ഹൗസിലാണ് സംഭവം. ചൊവ്വാഴ്ച രാത്രി പുതുവത്സരാഘോഷത്തിന്റെ ഭാഗമായി അഗർവാൾ ഫാം ഹൗസിൽ സംഘടിപ്പിച്ച പാർട്ടിക്കിടെയാണ് അപകടം നടന്നത്. താഴേക്ക് ഇറങ്ങുന്നതിനായി ആളുകൾ ലിഫ്റ്റിൽ കയറിയപ്പോൾ ബെൽറ്റ് പൊട്ടി ലിഫ്റ്റ് താഴേക്ക് പതിക്കുകയായിരുന്നു. അപകടത്തിൽ പരിക്കേറ്റവരെ ആശുപത്രിയിൽ പ്രവേശിപ്പിച്ചു. മരിച്ചവരുടെ വിവരങ്ങൾ പൊലീസ് വെളിപ്പെടുത്തിയിട്ടില്ല.