കോന്നി : കോന്നി അനത്താവളത്തിലെ കൊട്ടിക്കൊമ്പൻ പിഞ്ചു അവശനിലയിൽ. കാലിലെ നീര് കൂടിയതിനെ തുടർന്നാണ് ആരോഗ്യ സ്ഥിതി വീണ്ടും വഷളായത്.ഹെർപ്പിസ് വൈറസിനെ അതിജീവിച്ച് വീണ്ടും ജീവിതത്തിലേക്ക് തിരിച്ചുവന്ന ആനകുട്ടിയാണ് പിഞ്ചു. സാധാരണ ആനകളെ അപേക്ഷിച്ച് ഇടതുകാലിൽ രണ്ട് നഖങ്ങൾ അധികമാണ് പിഞ്ചുവിന്. നടക്കുമ്പോൾ ഉണ്ടാകുന്ന വേദനയാണ് ഇടതുകാലിന് കടുത്ത വേദനയും നീരും ഉണ്ടാക്കിയത്.ഇടതുകാലിന് വേദന അധികമായതോടെ വലുതുകാൽ മാത്രം നിലത്തുറപ്പിച്ചത് മൂലം ഈ കാലിലേക്കും നീര് ബാധിക്കുകയായിരുന്നു. ക്ഷീണാവസ്ഥ കാരണം എട്ട് ആഴ്ച്ചയോളമായി ആന ഉറങ്ങിയിട്ടെന്നും അധികൃതർ പറഞ്ഞു. നേരത്തെ അപകടാവസ്ഥ വനംവകുപ്പ് റിപ്പോർട്ട് ചെയ്തതിനെ തുടർന്ന് ചീഫ് ഫോറസ്​റ്റ് വെ​റ്റിനറി ഡോക്ടർ ഈശ്വർ, ഡോ.പി.അജിത് എന്നിവരുൾപെടുന്ന സംഘമാണ് കോന്നി ആനത്താവളത്തിലെത്തി പിഞ്ചുവിനെ പരിശോധിച്ചിരുന്നു.ടെലി വെ​റ്റിനറി ടെലി യൂണി​റ്റ് ഉൾപെടെ ആധുനിക സംവിധാനങ്ങൾ ഉപയോഗിച്ചാണ് ചികിത്സ നടത്തിയത്. മൂന്നരവയസുകാരനായ പിഞ്ചു 2016ൽ അച്ചൻകോവിൽ വനമേഖലയിലെ കടമ്പുപാറയിൽ നിന്ന് കൂട്ടം തെ​റ്റിയാണ് വനംവകുപ്പിന് ലഭിച്ചത്. 2017ൽ പിഞ്ചുവിന് ഹെർപിസ് രോഗം ബാധിച്ച് ചികിത്സയിൽ കഴിയുകയും വനംവകുപ്പിന്റെ മികച്ച ചികിത്സയും സംരക്ഷണവും കൊണ്ട് ആനക്കുട്ടി രക്ഷപെടുകയുമായിരുന്നു.