പത്തനംതിട്ട : വീടില്ലാത്തവരുടെ കെട്ടുറപ്പുള്ള ഭവനം എന്ന സ്വപ്നം സാക്ഷാത്ക്കരിക്കാൻ ലൈഫ് മിഷൻ പ്രവർത്തനങ്ങളിലൂടെ കഴിയുമെന്ന് ആന്റോ ആന്റണി എം.പി പറഞ്ഞു. പത്തനംതിട്ട നഗരസഭയിലെ ലൈഫ്പി.എം.എ.വൈ ഗുണഭോക്താക്കളുടെ കുടുംബ സംഗമവും അദാലത്തും റോയൽ ഓഡിറ്റോറിയത്തിൽ ഉദ്ഘാടനം ചെയ്യുകയായിരുന്നു അദ്ദേഹം. ലൈഫ് മിഷൻ പദ്ധതിപ്രകാരം പത്തനംതിട്ട നഗരസഭയിൽ നിർമ്മാണം പൂർത്തിയാക്കിയ 222ാമത് ഭവനത്തിന്റെ താക്കോൽ 22ാം വാർഡിലെ താജുദീന് നൽകി ആന്റോ ആന്റണി എം.പി നിർവഹിച്ചു. നഗരസഭ ചെയർപേഴ്‌സൺ റോസ്‌ലിൻ സന്തോഷ് അദ്ധ്യക്ഷത വഹിച്ചു. വീണാ ജോർജ് എം.എൽ.എ മുഖ്യപ്രഭാഷണം നടത്തി. കുടുംബ സംഗമത്തിൽ പങ്കെടുത്തവർക്കായി 20 സർക്കാർ വകുപ്പുകളുടെ സേവനം അദാലത്തിലൂടെ ലഭ്യമാക്കി. ആരോഗ്യ, കൃഷി, വ്യവസായം ഉൾപ്പെടെയുള്ള വകുപ്പുകളുടെ സേവനം ഗുണഭോക്താക്കൾക്കായി ഒരുക്കിയിരുന്നു. കൃഷി വകുപ്പ് സൗജന്യ പച്ചക്കറിതൈ വിതരണം,ശുചിത്വ മിഷൻ തുണി സഞ്ചി, ശുചിത്വ കലണ്ടർ വിതരണം എന്നിവ കുടുംബ സംഗമത്തിൽ പങ്കെടുത്തവർക്ക് വിതരണം ചെയ്തു. ശുചിത്വ മിഷന്റെയും കുടുംബശ്രീയുടെയും നേതൃത്വത്തിൽ പ്ലാസ്റ്റിക്കിനെതിരായ ബോധവൽക്കരണ തെരുവ്നാടകം അരങ്ങേറി. മികച്ച അംഗീകാർ റിസോഴ്‌സ് പേഴ്‌സണായി തിരഞ്ഞെടുക്കപ്പെട്ട നീതു വസന്തനെ നഗരസഭ വൈസ് ചെയർമാൻ എ.സഗീർ മൊമെന്റൊ നൽകി.കെ.ജാസിംകുട്ടി,റജീന ഷെരീഫ്,സിന്ധു അനിൽ,ശോഭാ കെ.മാത്യു,പി.കെ ജേക്കബ്, ആർ.ഹരീഷ്, ഷൈനി,സജിനി മോഹൻ,വി.ആർ ജോൺസൺ, അൻസർ മുഹമ്മദ്, വി.മുരളീധരൻ, അംബിക വേണു,പി.വി അശോക് കുമാർ,ടി.ആർ ശുഭ,സുശീല പുഷ്പൻ,കുടുംബശ്രീ ജില്ലാ മിഷൻ കോഓർഡിനേറ്റർ കെ.വിധു തുടങ്ങിയവർ പ്രസംഗിച്ചു.