തിരുവല്ല: അടുത്തകാലത്ത് ബി.എം ആൻഡ് ബി.സി നിലവാരത്തിൽ നിർമ്മാണം പൂർത്തിയാക്കിയ കാവുംഭാഗം - മുത്തൂർ - കുറ്റപ്പുഴ റോഡിൽ നടപ്പാത നിർമ്മിക്കാനായി എം.എൽ.എയുടെ ആസ്തി വികസന ഫണ്ടിൽ നിന്ന് 25 ലക്ഷം രൂപ അനുവദിച്ചതായി മാത്യു ടി.തോമസ് എം.എൽ.എ അറിയിച്ചു. കാവുംഭാഗം - മുത്തൂർ - കുറ്റപ്പുഴ റോഡ് 5.5 കോടി രൂപ മുടക്കി പൊതുമരാമത്ത് വകുപ്പ് ഉന്നത നിലവാരത്തിൽ പുനർനിർമ്മിച്ചിട്ടുള്ളതാണ്. കുറ്റപ്പുഴ - മുത്തൂർ റോഡിന്റെ നിർമ്മാണത്തിനായി സ്ഥലം വിട്ടുനൽകിയവർക്ക് മതിൽകെട്ടി നൽകിയതിനാൽ നടപ്പാത നിർമ്മിക്കാനായി പണം തികഞ്ഞില്ല. കാവുംഭാഗം മുതൽ കുറ്റപ്പുഴ വരെയുള്ള നടപ്പാത നിർമ്മാണം പൂർത്തീകരിക്കാനാണ് തുക അനുവദിച്ചിരിക്കുന്നത്. നിർമ്മാണത്തിന്റെ ചുമതല പൊതുമരാമത്ത് റോഡ്‌സ് വിഭാഗത്തിനാണ്.