പത്തനംതിട്ട: മാനദണ്ഡങ്ങൾ ലംഘിച്ച് ഫീൽഡ് സ്റ്റാഫിനെ ജോയിന്റ് ആർ.ടി.ഒ തസ്തികയിൽ നിയമിക്കാനുള്ള നീക്കത്തിനെതിരെ മോട്ടോർ വാഹന വകുപ്പിലെ ഭരണ വിഭാഗം ജീവനക്കാർ സമരത്തിൽ. 1981ലെ സ്‌പെഷ്യൽ റൂൾ ഭേദഗതി ചെയ്ത് നിലവിലെ പ്രൊമോഷൻ അനുപാതം അട്ടിമറിക്കുന്നതിനെതിരെയാണ് കേരള മോട്ടോർ വെഹിക്കിൾസ് ഡിപ്പാർട്‌മെന്റ് സ്റ്റാഫ് അസോസിയേഷൻ രംഗത്ത് വന്നത്. സ്‌പെഷ്യൽ റൂൾ സംരക്ഷിക്കുക, സേഫ് കേരളയിൽ മിനിസ്റ്റീരിയൽ ജീവനക്കാർക്ക് അർഹമായ പ്രാതിനിധ്യം നൽകുക എന്നീ ആവശ്യങ്ങൾ ഉന്നയിച്ച് കേരള മോട്ടോർ വെഹോക്കിൾസ് ഡിപ്പാർട്ട്‌മെന്റ് സ്റ്റാഫ് അസോസിയേഷൻ ഫെബ്രുവരി 15 മുതൽ നടത്തുന്ന അനിശ്ചിതകാല പണിമുടക്കിന് മുന്നോടിയായി ഇന്നലെയും ഇന്നുമായി നടത്തുന്ന സൂചന പണിമുടക്കിന്റെ ഭാഗമായി പത്തനംതിട്ട ആർ. ടി ഓഫീസ് കേന്ദ്രീകരിച്ച് മിനിസ്റ്റീരിയൽ ജീവനക്കാർ പ്രതിഷേധയോഗം ചേർന്നു. കെ.എം.വി.ഡി.എസ്.എ ജില്ലാ പ്രസിഡന്റ് ശ്രീധരൻ പോറ്റി, സെക്രട്ടറി പി.എ ബിന്ദു, വൈസ് പ്രഡിഡന്റ് ജി.ഗോപാലിക, കെ.എം.വി.ഡി.എസ്.എ സംസ്ഥാന കമ്മിറ്റിയംഗം ടി. ബിനോയി, മുരളീധരൻ ഇളയത്, മായ ദേവി, റിട്ടയേർഡ് ജോയിന്റ് ആർ.ടി.ഒ.എൻ കെ മോഹൻദാസ്, ഫിലിപ് സാമുവൽ, ദീപ, ജോർജ് കുട്ടി എന്നിവർ സംസാരിച്ചു.