മനോഹരമായി ഒഴുകുന്ന നദിയുടെ ഒത്തനടുക്കായി വിനോദസഞ്ചാരികളുടെ മുഴുവൻ ശ്രദ്ധ ആകർഷിച്ചുകൊണ്ട് ഒരു വീട്. സെർബിയയിലെ ബജീന ബസറയിലെ ഡ്രിന എന്ന നദിയിലാണ് ഈ മനോഹര വീടൊരുങ്ങിയിരിക്കുന്നത്. വർഷങ്ങൾക്ക് മുമ്പാണ് വീടിന്റെ നിർമാണം ആരംഭിച്ചത്. നദിയിൽ കുളിക്കാൻ ഇറങ്ങിയ കുറച്ച് ആളുകളാണ് ഈ വീടിന് പിന്നിൽ. കുളിക്കാൻ ഇറങ്ങിയപ്പോൾ നദിയുടെ നടുക്കായി പൊങ്ങിക്കിടക്കുന്ന ഒരു കല്ല് ഇവരുടെ ശ്രദ്ധയിൽപ്പെട്ടു. ഇതിന്റെ മുകളിലായി ഒരു വീട് പണിതാൽ എങ്ങനെയുണ്ടാകുമെന്നായി പിന്നീട് അവരുടെ ചിന്ത. അടുത്ത വേനൽക്കാലത്തും അവർ അവിടെയെത്തി. ഇത്തവണ എന്തായാലും വീട് നിർമ്മിക്കാമെന്ന് അവർ തീരുമാനിച്ചു.

തുടർന്ന് മര കഷ്‌‌ണങ്ങളും തടികളുമെല്ലാം അവർ നദിയുടെ നടുക്കുള്ള പാറയിൽ എത്തിക്കാനുള്ള ശ്രമമായി. കരയിൽ നിന്നും വളരെ ബുദ്ധിമുട്ടിയാണ് ഇവർ നദിയിൽ സാധനങ്ങൾ എത്തിച്ചത്. അങ്ങനെ ഒരു ഒറ്റമുറി വീട് അവർ അവിടെ പണിയാരംഭിച്ചു. അതേസമയം ആറ് തവണ ഈ വീട് ഒഴുക്കിൽപ്പെട്ടിരുന്നു. പക്ഷേ, തികഞ്ഞ ആത്മവിശ്വാസത്തോടെ വീണ്ടും അവർ പണി തുടർന്നു. അവസാനം 2011 ലാണ് വീടിന്റെ പണി പൂർത്തിയായത്. ഇതോടെ വിനോദസഞ്ചാരികളുടെ ഇഷ്ടകേന്ദ്രമായി മാറിക്കഴിഞ്ഞു ഈ നദിയിലെ വീട്.