പിഞ്ചു കുഞ്ഞുങ്ങളെ അമ്പതടി ഉയരമുള്ള കെട്ടിടത്തിന്റെ മുകളിൽ നിന്നും താഴേ​ക്കിട്ടാൽ എങ്ങനെയിരിക്കും. ആലോചിക്കാൻ പോലുമാവില്ല അത്. എന്നാൽ, മഹാരാഷ്ട്രയിലെ സോലാപൂർ ഗ്രാമത്തിൽ ഇത്തരത്തിലൊരു ആചാരമുണ്ട്. ഇവിടത്തെ മുസ്​തി ഗ്രാമത്തിലെ ബാബാ ഷെയ്​ഖ്​ ഉമർ സാഹിബ്​ ദർഗയിലാണ്​ ഈ ആചാരം നടക്കുന്നത്. അഞ്ഞൂറു വർഷമായി നടന്നു വരുന്നതാണത്രേ ഈ ആചാരം. ദർഗയിൽ പോയി പ്രാർത്ഥിച്ച്​ സന്താന സൗഭാഗ്യം ലഭിക്കുന്ന ദമ്പതികളൊക്കെ ദൈവത്തിനോടുള്ള നന്ദിസൂചകമായി തങ്ങളുടെ കുഞ്ഞുങ്ങളെ കൊണ്ടുവന്ന്​ അമ്പതടി ഉയരമുള്ള ദർഗയുടെ മുകളിൽ നിന്നും താഴേക്കിടണം.

ഇങ്ങനെ ചെയ്യുന്നത്​ കുട്ടികളുടെ ആരോഗ്യത്തിന്​ നല്ലതാണെന്നാണ്​ ഭക്തരുടെ വിശ്വാസം. താഴെ ആളുകൾ നിവർത്തിപ്പിടിച്ചിരിക്കുന്ന ഷീറ്റിലേക്കാണ്​ മുകളിൽ നിന്നും ഇടുന്ന കുഞ്ഞുങ്ങൾ വന്നുവീഴുന്നത്​. കുട്ടികൾക്ക് ഒരാപത്തും വരില്ലെന്നാണ്​ ഭക്തർ പറയുന്നത്​. ഇതേവരെ ആചാരത്തിനിടയിൽ കുട്ടികൾക്ക്​ പരുക്കേറ്റ സംഭവങ്ങളൊന്നുമുണ്ടായിട്ടില്ലെന്നും അവർ പറയുന്നു. ജാതി, മത ഭേദമില്ലാതെ ജനങ്ങൾ ഈ ആചാരം നടത്താൻ വേണ്ടി ഇവിടെയെത്തുന്നുണ്ട്​.