കൊല്ലം: താന്നിയിൽ പൊലീസിനെ ആക്രമിച്ച് പ്രതിയെ മോചിപ്പിച്ച സംഘത്തിൽ ഉൾപ്പെട്ട യുവാവ് പിടിയിലായി. താന്നി കാരിത്താസ് ഗാർഡനിൽ ജോയിയാണ് (33) പിടിയിലായത്.
താന്നി കാരിത്താസ് കോളനിക്ക് സമീപം ക്രിസ്മസ് ദിവസം ഉച്ചയ്ക്കായിരുന്നു സംഭവം. ഇരുവിഭാഗം യുവാക്കൾ ഏറ്റുമുട്ടുന്നതറിഞ്ഞാണ് പൊലീസ് സംഘം സ്ഥലത്തെത്തിയത്. സംഭവ സ്ഥലത്ത് നിന്ന് പിടികൂടിയ പ്രതികളിലൊരാളെ എട്ടോളം പേരടങ്ങുന്ന സംഘം പൊലീസിൽ നിന്നും മോചിപ്പിക്കുകയായിരുന്നു. സംഭവത്തിന്റെ വീഡിയോ ദൃശ്യങ്ങളിൽ നിന്നാണ് പൊലീസ് പ്രതികളെ തിരിച്ചറിഞ്ഞത്. ഇരവിപുരം ജംഗ്ഷനിൽ നിന്നാണ് ജോയിയെ പിടികൂടിയത്. കേസിൽ മൂന്ന് പ്രതികൾ നേരത്തേ പിടിയിലായിരുന്നു. സംഭവത്തിൽ ഉൾപ്പെട്ട യുവാക്കൾ ഇപ്പോഴും ഒളിവിലാണ്. ഇരവിപുരം സി.ഐ കെ. വിനോദ്, എസ്.ഐമാരായ എ.പി. അനീഷ്, സി.പി.ഒമാരായ രാജേഷ് കുമാർ, ശിവകുമാർ, അഭിലാഷ് എന്നിവരടങ്ങിയ സംഘമാണ് പ്രതികളെ പിടികൂടിയത്.