 മത്സരങ്ങൾ ആശ്രാമം ഹോക്കി സ്റ്റേഡിയത്തിൽ

 22ന് കേന്ദ്രമന്ത്രി അനുരാഗ് താക്കൂർ ഉദ്ഘാടനം ചെയ്യും

കൊല്ലം: പത്താമത് ദേശീയ സീനിയർ വനിതാ ഹോക്കി ചാമ്പ്യൻഷിപ്പ് 22 മുതൽ ഫെബ്രുവരി 9 വരെ കൊല്ലം ആശ്രാമം ഹോക്കി സ്റ്റേഡിയത്തിൽ നടക്കുമെന്ന് കേരള ഹോക്കി സംസ്ഥാന സെക്രട്ടറി ആർ. അയ്യപ്പൻ വാർത്താ സമ്മേളനത്തിൽ അറിയിച്ചു. വിവിധ സംസ്ഥാനങ്ങളുടെ ടീമുകളും സർവീസ് ടീമുകളും ഉൾപ്പെടെ 45 ടീമുകൾ മത്സരത്തിൽ പങ്കെടുക്കും.

ദേശീയ സംസ്ഥാന താരങ്ങൾ ഉൾപ്പെടെ ആയിരത്തോളം താരങ്ങളും ഒഫീഷ്യലുകളും മത്സരങ്ങളുടെ ഭാഗമാകും. 22ന് വൈകിട്ട് 4.30ന് ആശ്രാമം ഹോക്കി സ്റ്റേഡിയത്തിൽ കേന്ദ്രമന്ത്രി അനുരാഗ് താക്കൂർ ചാമ്പ്യൻഷിപ്പ് ഉദ്ഘാടനം ചെയ്യും. അന്താരാഷ്ട്ര ഹോക്കി ഫെഡറേഷൻ പ്രസിഡന്റ് ഡോ. നരേന്ദ്ര ധ്രുവ് ബത്ര, മന്ത്രിമാരായ ജെ. മേഴ്സിക്കുട്ടിഅമ്മ, കെ. രാജു, എൻ.കെ. പ്രേമചന്ദ്രൻ എം.പി, ഒളിമ്പ്യൻ പി.ആർ. ശ്രീജേഷ്,

സംസ്ഥാന സ്‌പോർട്സ് കൗൺസിൽ പ്രസിഡന്റ് മേഴ്സിക്കുട്ടൻ തുടങ്ങിയവർ പങ്കെടുക്കും. ഉദ്ഘാടനത്തിന് മുന്നോടിയായി ആശ്രാമം ലിങ്ക് റോഡ് പരിസരത്ത് നിന്ന് ഹോക്കി സ്റ്റേഡിയത്തിലേക്ക് ഘോഷയാത്ര നടക്കും.

19 ദിവസം നീണ്ടുനിൽക്കുന്ന ചാമ്പ്യൻഷിപ്പിൽ എല്ലാ ദിവസവും മികച്ച കായിക താരത്തിന് പ്രത്യേക പുരസ്‌കാരവും ആദരവും നൽകും. എല്ലാ ദിവസവും വൈകിട്ട് കലാസാംസ്‌കാരിക പരിപാടികളും നടക്കും. വാർത്താ സമ്മേളനത്തിൽ കേരള ഹോക്കി കൊല്ലം യൂണിറ്റ് പ്രസിഡന്റ് എൻ. വിനോദ് ലാൽ, സെക്രട്ടറി എം.ജെ. മനോജ്, ജില്ലാ ഒളിമ്പിക് അസോസിയേഷൻ കൺവീനർ ജയകൃഷ്‌ണൻ എന്നിവരും പങ്കെടുത്തു.

 ഉദ്ഘാടനത്തിന് മുന്നോടിയായി ഘോഷയാത്ര

ഉദ്ഘാടന ചടങ്ങിന് മുന്നോടിയായി ആശ്രാമം ലിങ്ക് റോഡ് പരിസരത്ത് നിന്ന് ഹോക്കി സ്റ്റേഡിയത്തിലേക്ക് ഘോഷയാത്ര നടക്കും. വിവിധ ബാൻഡ് സംഘങ്ങൾ, സ്‌കൂൾ വിദ്യാർത്ഥികൾ, കേരള തനിമ വിളിച്ചോതുന്ന ഫ്ളോട്ടുകൾ, വാദ്യമേളങ്ങൾ എന്നിവ മിഴിവേകും. നൂറ് കണക്കിന് കായിക താരങ്ങളും വിവിധ സാമൂഹിക സാംസ്‌കാരിക സംഘടനകളും പ്രമുഖ വ്യക്തികളും ഘോഷയാത്രയിൽ പങ്കാളികളാകും.