രാമനാട്ടുകര (കോഴിക്കോട്): വിവാഹ വാഗ്ദാനം നൽകി ഇതരസംസ്ഥാനക്കാരിയെ പെൺവാണിഭത്തിനു ഇരയാക്കിയെന്ന കേസിൽ ​ യുവതിയടക്കം രണ്ടു പേർ അറസ്റ്റിലായി. പാലക്കാട് മണ്ണാർക്കാട് കോട്ടപ്പാടം പൂളമണ്ണ ഹൗസിൽ മൊയ്തീനും (34), കൊല്ലം പൂതക്കുളം കലയ്ക്കോട് സ്വദേശിനിയായ മുപ്പത്തിയഞ്ചുകാരിയുമാണ് ഫറോക്ക് ​പൊ​ലീസ് അറസ്റ്റ് ചെയ്തത്. രാമനാട്ടുകരയിൽ വാടകവീട് കേന്ദ്രീകരിച്ചു അനാശാസ്യം നടക്കുന്നുവെന്ന രഹസ്യവിവരത്തെ തുടർന്നു ഫറോക്ക് സി.ഐ കെ. കൃഷ്ണന്റെ നേതൃത്വത്തിൽ നടത്തിയ പരിശോധനയിലാണ് പെൺവാണിഭ സംഘം പിടിയിലായത്.​ ​അസാം സ്വദേശിയായ യുവതിയെയാണ് പെൺവാണിഭത്തിനായി ഉപയോഗിച്ചത്. വിവാഹം കഴിപ്പിച്ചു നൽകമെന്നു പറഞ്ഞു യുവതിയെ ബംഗളൂരുവിൽ നിന്ന് എത്തിച്ചതായിരുന്നു. വിവിധ സ്ഥലങ്ങളിൽ കൊ​ണ്ടുപോയി വേശ്യാവൃത്തിയ്ക്ക് നിർബന്ധിക്കുകയായിരുന്നുവെന്നാണ് യുവതിയുടെ മൊഴി. പൊലീസ് കൂടുതൽ അന്വേഷണം നടത്തിവരികയാണ്. യുവതിയെ അഭയ കേന്ദ്രത്തിലേക്ക് മാറ്റി.