തൃശൂർ: ഹാപ്പി ഡേയ്സ് തൃശൂർ ഷോപ്പിംഗ് ഫെസ്റ്റിവെലിന് ബുധനാഴ്ച്ച സമാപനം. കഴിഞ്ഞ മാസം 14 ന് മുഖ്യമന്ത്രി പിണറായി വിജയൻ ഉദ്ഘാടനം ചെയ്ത ഫെസ്റ്റിവലിന്റെ സമാപന ചടങ്ങ് തദ്ദേശ സ്വയംഭരണ മന്ത്രി എ.സി മൊയ്തീൻ ഉദ്ഘാടനം ചെയ്യും. വിവിധ കലാ സാംസ്കാരിക, കായിക, പരിപാടികൾ അരങ്ങേറിയ ഫെസ്റ്റിവലിൽ വ്യാപാര സ്ഥാപനങ്ങൾ വലിയ തോതിൽ കിഴിവുകളും സമ്മാനങ്ങളും നൽകി. തേക്കിൻകാട് മൈതാനിയിൽ 14 ന് വൈകിട്ട് 7 ന് നടക്കുന്ന സമാപന സമ്മളനം മന്ത്രി എ.സി മൊയ്തീൻ ഉദ്ഘാടനം ചെയ്യും. ഒരു മാസക്കാലം കടകളിൽ നിന്നും സാധനങ്ങൾ വാങ്ങുമ്പോൾ ലഭിക്കുന്ന കൂപ്പണുകൾ നറുക്കെടുത്ത് ഓരോ ദിവസവും ടി.വി ഉൾപ്പടെ ഒമ്പത് സമ്മാനങ്ങൾ നൽകിയിരുന്നു. ആഴ്ച അവസാനം കാറും, മോട്ടോർ ബൈക്കും നൽകി. സമാപന ചടങ്ങിൽ മന്ത്രി വി.എസ് സുനിൽ കുമാർ സമ്മാനദാനം നിർവഹിക്കും. മേയർ അജിത വിജയൻ അദ്ധ്യക്ഷത വഹിക്കും. ജനറൽ കൺവീനർ ടി.എസ് പട്ടാഭിരാമൻ ആമുഖപ്രസംഗം നടത്തും. സിനിമ പിന്നണി ഗായിക സയനോര ബാൻഡ് അവതരിപ്പിക്കുന്ന സംഗീത വിരുന്നുണ്ടാകും. ഗിന്നസ് റെക്കാഡിൽ ഇടം പിടിക്കുന്ന കേക്ക് നിർമ്മിച്ചുകൊണ്ട് ഫെസ്റ്റിവലിന് നാളെ കർട്ടൻ വീഴും. കേരള ബേക്കേഴ്സ് അസോസിയേഷനാണ് ഇതിന് ചുക്കാൻ പിടിക്കുക.