തൃശൂർ: സംസ്ഥാന സർക്കാരിന്റെ ലൈഫ് മിഷൻ സമ്പൂർണ പാർപ്പിട പദ്ധതിയിലൂടെ രണ്ട് ഘട്ടങ്ങളിലായി ജില്ലയിൽ പൂർത്തിയാക്കിയത് 14687 വീടുകളുടെ നിർമ്മാണം. ഗുണഭോക്താക്കളുടെ ജില്ലാതല സംഗമവും നിർമ്മാണ പൂർത്തീകരണ പ്രഖ്യാപനവും 23ന് നടക്കുമെന്ന് കളക്ടർ എസ്. ഷാനവാസ് പറഞ്ഞു. രണ്ടു ഘട്ടങ്ങളിലായി വീടു നിർമ്മാണത്തിന് കരാർ ഒപ്പുവച്ചത് 17251 ഗുണഭോക്താക്കളാണ്. ഇതിൽ 2564 വീടുകൾ മാത്രമാണ് ഇനി നിർമ്മാണം പൂർത്തിയാക്കാനുളളത്.

ജില്ലാ പഞ്ചായത്ത് പട്ടികജാതിക്കാർക്കായുള്ള 179 വീടുകളും തൃശൂർ കോർപറേഷൻ 314 വീടുകളും ഏഴ് നഗരസഭകൾ 341 വീടുകളും 16 ബ്ലോക്ക് പഞ്ചായത്തുകൾ 1331 വീടുകളും 75 ഗ്രാമപഞ്ചായത്തുകളിലായി 353 വീടുകളും നിർമ്മിച്ചു. പട്ടികജാതി വകുപ്പ് 305 വീടുകളും പട്ടികവർഗ വകുപ്പ് 118 വീടുകളും ഫിഷറീസ് വകുപ്പ് 10 വീടുകളും ന്യൂനപക്ഷ വകുപ്പ് 3 വീടുകളും പൂർത്തിയാക്കി. ഒന്നാം ഘട്ടത്തിൽ ജില്ലയിലെ തദ്ദേശ സ്ഥാപനങ്ങളെല്ലാം ചേർന്ന് പൂർത്തിയാക്കിയത് 2953 വീടുകളുടെ നിർമ്മാണമാണ്.

സംസ്ഥാനത്ത് ഒന്നാം ഘട്ടം ഏറ്റവുമധികം വീടുകൾ നിർമ്മിച്ച ജില്ലാ പഞ്ചായത്ത് എന്ന നേട്ടം തൃശൂരിനാണ്. രണ്ടാം ഘട്ടത്തിൽ 3669 വീടുകളുടെ നിർമ്മാണം പൂർത്തിയാക്കി. 1034 ഗുണഭോക്താക്കളുടെ വീടുകളുടെ നിർമ്മാണം പുരോഗമിക്കുന്നു. കോർപറേഷനിലും 7 നഗരസഭകളിലുമായി പി.എം.എ.വൈ പദ്ധതി പ്രകാരം നഗരത്തിൽ 6575 വീടുകളും പി.എം.വൈ പദ്ധതി പ്രകാരം ഗ്രാമത്തിൽ1490 വീടുകളും നിർമ്മാണം പൂർത്തിയാക്കിയിട്ടുണ്ട്. ലൈഫ് മിഷന്റെ മൂന്നാം ഘട്ടത്തിൽ 10964 ഗുണഭോക്താക്കൾക്കുളള ഫ്‌ളാറ്റുകളുടെയും ക്ലസ്റ്റർ ഭവനങ്ങളുടെയും നിർമ്മാണമാണ് ഏറ്റെടുക്കുക. ഇതിനായി 49 ഏക്കർ ഭൂമി കണ്ടെത്തിക്കഴിഞ്ഞു.

വടക്കാഞ്ചേരി ചരൽപ്പറമ്പിലെ ഫ്‌ളാറ്റ് സമുച്ചയനിർമ്മാണം അവസാന ഘട്ടത്തിലാണ്. ഗുണഭോക്താക്കളുടെ ജില്ലാ സംഗമം ഉച്ചക്ക് 1.30 ന് ഇൻഡോർ സ്റ്റേഡിയത്തിൽ തദ്ദേശ സ്വയംഭരണ മന്ത്രി എ.സി. മൊയ്തീൻ ഉദ്ഘാടനം ചെയ്യും. കൃഷി മന്ത്രി വി.എസ്. സുനിൽകുമാർ അദ്ധ്യക്ഷനാകും. പൊതു വിദ്യാഭ്യാസ വകുപ്പ് മന്ത്രി പ്രൊഫ. സി. രവീന്ദ്രനാഥ്, ഗവ. ചീഫ് വിപ്പ് കെ. രാജൻ തുടങ്ങിയവർ പങ്കെടുക്കും. വാർത്താ സമ്മേളനത്തിൽ ജില്ലാ പഞ്ചായത്ത് വൈസ് പ്രസിഡന്റ് എൻ.കെ. ഉദയപ്രകാശ്, ജില്ലാ ഇൻഫർമേഷൻ ഓഫീസർ ബി. സേതുരാജ്, ജില്ലാ പഞ്ചായത്ത് സെക്രട്ടറി കെ.ജി. തിലകൻ, ജില്ലാ ലൈഫ് മിഷൻ കോ- ഓർഡിനേറ്റർ ലിൻസ് ഡേവീസ് എന്നിവർ പങ്കെടുത്തു.

ലൈഫ് മിഷൻ കണക്കിങ്ങനെ

രണ്ട് ഘട്ടങ്ങളിലായി ജില്ലയിൽ പൂർത്തിയാക്കിയത് - 14687 വീടുകൾ

വീടു നിർമ്മാണത്തിന് കരാർ ഒപ്പുവച്ചത് 17251 ഗുണഭോക്താക്കൾ

ഇതിൽ നിർമ്മാണം പൂർത്തിയാക്കാനുളളത് 2564 വീടുകൾ മാത്രം

ഏറ്റവുമധികം വീടുകൾ നിർമ്മിച്ച ജില്ലാ പഞ്ചായത്ത് എന്ന നേട്ടം തൃശൂരിന്

ഒന്നാം ഘട്ടത്തിൽ തദ്ദേശ സ്ഥാപനങ്ങൾ പൂർത്തിയാക്കിയത് 2953 വീടുകൾ