മാള: സംസ്ഥാന സർക്കാരിന്റെ പൊതു വിദ്യാഭ്യാസ യജ്ഞത്തിന്റെ ഭാഗമായി ഒരോ വിദ്യാലയത്തിന്റെയും പുരോഗമനത്തിന് ആവശ്യമായ നിർദ്ദേശങ്ങളും അഭിപ്രായങ്ങളും സ്വരൂപിക്കുന്നതിനുമായി എം.എൽ.എ സന്ദർശന പരിപാടി ആരംഭിച്ചു. കൊടുങ്ങല്ലൂർ മണ്ഡലത്തിലെ എല്ലാ വിദ്യാഭ്യാസ സ്ഥാപനങ്ങളിലും മികവ് 2020 എന്ന പേരിലാണ് സന്ദർശനം നടത്തുന്നത്. 30 വരെയുള്ള തീയതികളിലായി മണ്ഡലത്തിലെ എല്ലാ ഹെസ്കൂൾ, ഹയർ സെക്കൻഡറി വിദ്യാലയങ്ങളാണ് സന്ദർശിക്കുന്നത്.

ഇതുവരെ മണ്ഡലത്തിൽ 35 കോടി രൂപ വിവിധ പദ്ധതികളായി വിദ്യാഭ്യാസ മേഖലയിൽ അനുവദിക്കുകയും ഭൂരിഭാഗവും പൂർത്തീകരിക്കുകയും ചെയ്തിട്ടുണ്ട്. കൂടാതെ വിദ്യാലയ സന്ദർശനവേളയിൽ ഒരോ വിദ്യാലയങ്ങളിലും സംസ്ഥാന തലത്തിൽ പുരസ്കാരങ്ങൾ നേടിയ വിദ്യാർത്ഥികളെയും അദ്ധ്യാപകരെയും അനുമോദിക്കുന്നുണ്ട്. കൂടാതെ കഴിഞ്ഞ എസ്.എസ്.എൽ.സി, പ്ലസ് ടു പരീക്ഷകളിൽ മുഴുവൻ വിഷയങ്ങളിൽ എ പ്ലസ് നേടിയ വിദ്യാർത്ഥികളെയും പുരസ്കാരം നൽകി ആനുമോദിക്കുന്നതും പദ്ധതിയുടെ ഭാഗമായി നടക്കും.

പദ്ധതിയുടെ ഉദ്ഘാടനം തെക്കൻ താണിശേരി സെന്റ് ആന്റണീസ് ഗേൾസ് ഹൈസ്കൂളിൽ ആരംഭിച്ചു. വി.ആർ. സുനിൽകുമാർ എം.എൽ.എ ഉദ്ഘാടനം ചെയ്തു. പി.ടി.എ പ്രസിഡന്റ് പി.കെ. സോജൻ അദ്ധ്യക്ഷനായി. മേലഡൂർ സർക്കാർ സമിതി ഹയർ സെക്കൻഡറി സ്‌കൂളിൽ നടന്ന ചടങ്ങിൽ മാള ബ്ലോക്ക് പഞ്ചായത്ത് പ്രസിഡന്റ് ഇ. കേശവൻകുട്ടി അദ്ധ്യക്ഷനായി.

ജില്ലാ പഞ്ചായത്ത് അംഗം അഡ്വ. നിർമ്മൽ സി. പാത്താടൻ മുഖ്യാഥിതിയായിരുന്നു. അന്നമനട പഞ്ചായത്ത് വൈസ് പ്രസിഡന്റ് ടി.കെ. ഗോപി, വാർഡ് മെമ്പർ ബേബി പൗലോസ് , ബി.പി.ഒ: വി.വി. ശശി, വി.ആർ. ഡിങ്കൻ, പി.എഫ്. ജോസഫ്, ബിന്ദു, പ്രിൻസിപ്പൽ ജയലത, പ്രധാനദ്ധ്യാപിക ഹെഡ്മിസ്ട്രസ് ജാസ്മി എന്നിവർ സംസാരിച്ചു.