കൊടുങ്ങല്ലൂർ: എം.ഇ.എസ് അസ്മാബി കോളേജിന്റെ ഗ്രാമസേവന പദ്ധതിയായ ഗ്രാമിക 2020ന്റെ ഉദ്ഘാടനം ഇന്ന് എടവിലങ്ങ് പഞ്ചായത്തിൽ നടക്കും. രാവിലെ 10ന് ഇ.ടി. ടെൈസൺ മാസ്റ്റർ എം.എൽ.എ ഉദ്ഘാടനം ചെയ്യും. ഇലക്ട്രോണിക് മാലിന്യം ഭൂമിക്കൊരു പുതുശത്രു എന്ന സന്ദേശമുയർത്തിയാണ് വിദ്യാർത്ഥികൾ ഗ്രാമങ്ങളിലേക്ക് ഇറങ്ങി ചെല്ലുന്നത്. ഇ- വേസ്റ്റ് മാലിന്യങ്ങളിൽ അടങ്ങിയിരിക്കുന്ന വിഷവസ്തുക്കൾ മനുഷ്യനിൽ കാൻസർ, ഹൃദയം, കരൾ സംബന്ധമായ അസുഖങ്ങൾക്കും മണ്ണ്, ജലം, വായു മലിനീകരണത്തിനും കാരണമാകുന്നു എന്ന തിരിച്ചറിവ് ഉണ്ടാക്കുക എന്നതാണ് ഗ്രാമിക 2020ന്റെ ലക്ഷ്യം.

കോളേജിന്റെ സമീപപ്രദേശത്തെ പഞ്ചായത്തുകളായ എടവിലങ്ങ്, എസ്.എൻ പുരം, എറിയാട് എന്നിവിടങ്ങളിലെ വീടുകളിൽ കുട്ടികൾ നേരിട്ടെത്തി ഇ- മാലിന്യങ്ങൾ സൗജന്യമായി ശേഖരിച്ച് ശാസ്ത്രീയമായി സംസ്കരിക്കുന്ന കേന്ദ്രങ്ങളിൽ എത്തിക്കും. കോളേജിലെ വിവിധ ഡിപ്പാർട്ട്മെന്റുകളുടെ നേതൃത്വത്തിൽ വാർഡ് അടിസ്ഥാനത്തിലും പഞ്ചായത്ത് അടിസ്ഥാനത്തിലും വിവിധപരിപാടികളാണ് ഒരുക്കിയിരിക്കുന്നത്. ബോധവത്കരണ ക്ലാസുകൾ സംഘടിപ്പിക്കും. അസ്മാബി കോളേജ് സെക്രട്ടറി ആൻഡ് കറസ്പോണ്ടന്റ് സലീം അറയ്ക്കൽ, ചെയർമാൻ ആസ്പിൻ അഷ്‌റഫ്‌, പ്രിൻസിപ്പാൾ ഡോ. അജിംസ് പി മുഹമ്മദ്, ഗ്രാമിക കോ ഓർഡിനേറ്റർമാരായ മുഹമ്മദ്‌ അരീജ്.ഇ.എം, സനന്ദ് സദാനന്ദൻ, സ്വാശ്രയവിഭാഗം മേധാവി ഡോ. കെ.പി. സുമേധൻ എന്നിവരാണ് നേതൃത്വം നൽകുന്നത്. കോളേജിലെ രണ്ടായിരത്തിലധികം വിദ്യാർത്ഥികളും അദ്ധ്യാപകരും പഞ്ചായത്തുകളിലെ വാർഡ് മെമ്പർമാരും പങ്കെടുക്കും.