മുടപുരം: മംഗലപുരം ഗ്രാമ പഞ്ചായത്തിൽ 2020-21 വാർഷിക പദ്ധതി രൂപീകരണത്തിന്റെ മുന്നോടിയായുള്ള ഭിന്നശേഷി ഗ്രാമസഭ തോന്നയ്ക്കൽ ഇൻഡോർ സ്റ്റേഡിയത്തിൽ നടന്നു. ഗ്രാമ പഞ്ചായത്ത് വൈസ് പ്രസിഡന്റ് സുമ ഇടവിളാകം ഉദ്‌ഘാടനം ചെയ്തു. ക്ഷേമകാര്യ ചെയർപേഴ്‌സൺ എസ്. ജയയുടെ അദ്ധ്യക്ഷതയിൽ വികസനകാര്യ സ്റ്റാൻഡിംഗ് കമ്മിറ്റി ചെയർമാൻ മംഗലപുരം ഷാഫി, ആരോഗ്യകാര്യ സ്റ്റാൻഡിംഗ് കമ്മിറ്റി ചെയർമാൻ വേണുഗോപാലൻ നായർ, മെമ്പർമാരായ കെ.എസ്. അജിത് കുമാർ, കെ. ഗോപിനാഥൻ, വി. അജികുമാർ, എസ്. സുധീഷ് ലാൽ, എം.എസ്. ഉദയകുമാരി, ലളിതാംബിക, തങ്കച്ചി ജഗന്നിവാസൻ, സെക്രട്ടറി ജി.എൻ. ഹരികുമാർ, അസിസ്റ്റന്റ് സെക്രട്ടറി എസ്. സുഹാസ് ലാൽ, ഐ.സി.ഡി.സി സൂപ്പർവൈസർ ബിന്ദുകുമാരി തുടങ്ങിയവർ പങ്കെടുത്തു. ഭിന്നശേഷികാർക്ക് സ്വയംതൊഴിൽ സംരംഭം, ചികിത്സാ പദ്ധതി, മാതാപിതാക്കൾ നഷ്ടപ്പെടുന്ന ഭിന്നശേഷിക്കാർക്ക് സംരക്ഷണകേന്ദ്രം, ഭിന്നശേഷിയായിട്ടുള്ള ആശ്രയമില്ലാത്ത പെൺകുട്ടികൾക്ക് വിവാഹ ധനസഹായം എന്നിവ പദ്ധതി ആസൂത്രണത്തിൽ ഉൾപ്പെടുത്തുമെന്ന് ഗ്രാമപഞ്ചായത്ത് പ്രസിഡന്റ് വേങ്ങോട് മധു ഗ്രാമസഭയിൽ പ്രഖ്യാപിച്ചു.