തിരുവനന്തപുരം: സർക്കാരിന്റെ തലവനായ ഗവർണർ സർക്കാരിനും ജനങ്ങൾക്കുമെതിരേ പൗരത്വനിയമ ഭേദഗതി വിഷയത്തിൽ നിരന്തരം വെല്ലുവിളി നടത്തിയിട്ടും ഒരക്ഷരം പോലും പ്രതികരിക്കാത്ത മുഖ്യമന്ത്രി പിണറായി വിജയൻ 11 ബി.ജെ.പിയിതര മുഖ്യമന്ത്രിമാർക്ക് ഇതേ വിഷയത്തിൽ കത്തെഴുതിയത് വിരോധാഭാസമാണെന്ന് കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രൻ പറഞ്ഞു. പൗരത്വനിയമ ഭേദഗതിക്കെതിരെ വിലക്കുകളെല്ലാം മറികടന്ന് തെരുവിലിറങ്ങി പ്രതിഷേധിച്ച കോൺഗ്രസ്, കോൺഗ്രസിതര മുഖ്യമന്ത്രിമാർക്കാണ് പിണറായി കത്തയച്ചത്. ശീതികരിക്കപ്പെട്ട മുറിയിലിരുന്ന് കത്തെഴുതുന്ന പിണറായിക്ക് ആത്മാർത്ഥത ഉണ്ടെങ്കിൽ ആദ്യം തെളിയിക്കേണ്ടത് സംസ്ഥാനത്താണ്. കേരളത്തിന്റെ ചരിത്രത്തിൽ ഇതുപോലെ ഒരു ഗവർണറും രാഷ്ട്രീയം കളിച്ചിട്ടില്ല. അതിനെതിരെ ശക്തമായി പ്രതികരിക്കേണ്ട മുഖ്യമന്ത്രി കേന്ദ്ര നയങ്ങൾ കണ്ണുംപൂട്ടി നടപ്പാക്കുന്നതിൽ വ്യാപൃതനാണ്. പൗരത്വ നിയമഭേദഗതിക്കെതിരേ സമരം നടത്തിയ കോൺഗ്രസ് നേതാക്കളെയടക്കം നിരവധി പേരെ ജാമ്യമില്ലാക്കുറ്റം ചുമത്തി ജയിലിലടച്ചു.