വിതുര: വിതുര ഗവ. വൊക്കേഷണൽ ആൻഡ് ഹയർ സെക്കൻഡറി സ്കൂളിലെ സ്റ്റുഡന്റ്സ് പൊലീസ് കെഡറ്റുകളുടെ നേതൃത്വത്തിൽ നടത്തുന്ന നോ പ്ലാസ്റ്റിക്, നോ ഫന്റാസ്റ്റിക് എന്ന നൂതനമായ ക്യാമ്പയിനുമായി ബന്ധപ്പെട്ട് വിദ്യാർത്ഥികൾക്കായി ന്യൂസ് പേപ്പർ വേസ്റ്റ് ബിൻ നിർമ്മാണ ശില്പശാല സംഘടിപ്പിച്ചു. ന്യൂസ് പേപ്പറുകൾ പ്രത്യേക മോൾഡിൽ പല ലെയറുകളായി ഒട്ടിച്ചാണ് വേസ്റ്റുബിന്നുകൾ തയാറാക്കുന്നത്. റിട്ട. അദ്ധ്യാപകനും പരിസ്ഥിതി പ്രവർത്തകനുമായ ജി.ആർ. ഹരിയാണ് ശില്പശാല നയിച്ചത്. പേപ്പർ ബാഗ് നിർമ്മാണ പരിശീലനവും കെഡറ്റുകൾക്ക് ഇതിനോടകം നൽകിക്കഴിഞ്ഞു. പ്ലാസ്റ്റിക് മാലിന്യം പ്രകൃതിക്കുണ്ടാക്കുന്ന ദോഷങ്ങളെക്കുറിച്ചും പകരം സംവിധാനങ്ങൾ കൈക്കൊള്ളേണ്ടതിന്റെ ആവശ്യകതയെക്കുറിച്ചും പൊതു ജനങ്ങൾക്ക് ഇതിനോടകം കെഡറ്റുകൾ ബോധവത്കരണം നൽകി. തങ്ങൾ നിർമ്മിച്ച പേപ്പർ വേസ്റ്റു ബിന്നുകൾ ജില്ലയിലെ വിവിധ സ്കൂളുകൾ, ഓഫീസുകൾ, വീടുകൾ എന്നിവിടങ്ങളിൽ എത്തിച്ച് ബോധവത്കരണം തുടരാനാണ് കെഡറ്റുകളുടെ പദ്ധതി. കമ്മ്യൂണിറ്റി പൊലീസ് ഒാഫീസർ കെ. അൻവർ, സ്കൂൾ പ്രിൻസിപ്പൽമാരായ ഡോ.എസ്. ഷീജ, മറിയാമ്മാചാക്കോ, ഹെഡ്മിസ്ട്രസ് ജോതിഷ്ജലൻ എന്നിവർ പദ്ധതിക്ക് നേതൃത്വം നൽകുന്നത്.