തിരുവനന്തപുരം: ''അളിയാ നീ എത്രയും പെട്ടെന്ന് ഇവിടേക്ക് വരണം. അടിപൊളിയാണ്. ഫൈവ് സ്റ്റാർ ഹോട്ടലിനേക്കാൾ മുടിഞ്ഞ സൗകര്യമാ ഇവിടെ. അതി സുരക്ഷയെന്നൊക്കെ കേട്ടപ്പോ ആദ്യം ഞെട്ടിയെങ്കിലും സ്വർഗമാ ബ്രോ സ്വർഗം. വിലകൂടിയ ടൈലുകൾ പതിച്ച അറ്റാച്ച്ഡ് മുറികൾ. ആഹാരം കഴിക്കാൻ ഡൈനിംഗ് ടേബിളുകൾ, വാഷ് ബേസിൻ. കഴിക്കാനോ പ്രാഥമിക കൃത്യങ്ങൾക്കോ ക്യൂനിൽക്കേണ്ട. ഉറങ്ങാൻ കട്ടിൽ. വീട്ടിൽപോലുമില്ലാത്ത എല്ലാ സൗകര്യങ്ങളുമുണ്ട്. പുലർച്ചെ യോഗ, വൈകുന്നേരം കായിക പരിശീലനം. ഫുട്‌‌ബോളുൾപ്പെടെ കളികൾ. വിശാലമായ ലൈബ്രറി. അവിടത്തെപ്പോലെ ആരുടെയും ക്രോസും മുറയുമൊന്നുമില്ല. റൂമെല്ലാം കാലി. എല്ലാവരും ഹാപ്പിയാണ്. നീ കൂടി വന്നാൽ നമുക്ക് ഇവിടെ അടിച്ചുപൊളിക്കാം'.
നാട്ടിലുള്ള ചങ്കിന് ഗൾഫിലെ ഒരു സുഹൃത്ത് അയച്ച കത്താണിത് എന്ന് കരുതിയാൽ തെറ്റി. തിരുവനന്തപുരം പൂജപ്പുര സെൻട്രൽ ജയിലിലെ സുഹൃത്തിനെ വിയ്യൂരിലെ അതി സുരക്ഷാ ജയിലിലേക്ക് ക്ഷണിച്ചുകൊണ്ട് ഒരു തടവുപുള്ളി എഴുതിയ കത്താണിത്. അങ്ങനെ തടവുകാർക്കിടയിൽ ഹിറ്റായിരിക്കുകയാണ് വിയ്യൂർ ജയിൽ. സുരക്ഷ ഇത്തരി കടുകട്ടിയാണെങ്കിലും ഉള്ളിലെ സ്വാതന്ത്ര്യമാണ് തടവുകാരെ അവിടം പ്രിയപ്പെട്ടതാക്കുന്നത്. അതിനാലാണ് വിയ്യൂരിൽ എത്തപ്പെട്ടവർ മറ്റ് ജയിലുകളിൽ കഴിയുന്നവരെകൂടി അങ്ങോട്ട് ക്ഷണിക്കുന്നതും. ഈ കത്തും അത്തരത്തിലൊന്നാണ്.
വിയ്യൂർ അതിസുരക്ഷാ ജയിൽ ഓപ്പൺ ചെയ്തശേഷം അവിടത്തെ സൗകര്യങ്ങളും സ്വാതന്ത്ര്യവും വിവരിച്ച് തടവുകാരായ നിരവധി പേരാണ് കണ്ണൂർ, പൂജപ്പുര സെൻട്രൽ ജയിലുകളിലെ അടുപ്പക്കാർക്ക് കത്ത് അയയ്ക്കുന്നത്. തടവുകാർക്കുള്ള കത്തുകൾ ജയിൽ ഉദ്യോഗസ്ഥർ പൊട്ടിച്ച് വായിച്ച് നോക്കിയശേഷമേ നൽകാറുളളൂവെന്നതിനാൽ വിയ്യൂരിലേക്ക് ക്ഷണം ലഭിച്ച വിവരം തടവുകാർ പലരും അറിയുന്നില്ലെന്ന് മാത്രം.
അതിനുമാത്രമെന്താ വിയ്യൂരിൽ..?
സുരക്ഷയിൽ മാത്രമല്ല സൗകര്യങ്ങളിലും വിയ്യൂർ ജയിൽ മുൻപന്തിയിലാണ്. വിദേശങ്ങളിലേതുപോലെ വിശാലമായ സെൽമുറികളിൽ സൗകര്യങ്ങളുടെ ധാരാളിത്തം. വൃത്തിയും വെടിപ്പും. മതിയായ വെളിച്ചവും വായുസഞ്ചാരവുമുള്ള മുറികൾ. സദാ തുറന്ന് വിട്ടിരിക്കുന്നതിനാൽ ജയിലെന്ന ഫീലിംഗില്ല. തൊഴിൽ നിർബന്ധമില്ല. വേണമെങ്കിൽ മാത്രം ജോലി ചെയ്യാം.
ആരെല്ലാമുണ്ട്..?
എൻ.ഐ.എ കേസുകളിൽപ്പെട്ടവരെയും കുഴപ്പക്കാരെയും വധശിക്ഷയ്ക്ക് വിധിക്കപ്പെട്ടവരെയുമൊക്കെയാണ് വിയ്യൂരിലെ അതി സുരക്ഷാ ജയിലേക്ക് മാറ്റുന്നത്. അല്ലാതെ സാദാ തടവുകാർക്ക് അവിടേക്ക് പ്രവേശനമില്ല. ആലുവ കൂട്ടക്കൊലക്കേസിലെ ആന്റണി, റിപ്പർ ജയാനന്ദൻ, ആട് ആന്റണി തുടങ്ങി 19 വധശിക്ഷക്കാരും കണ്ടക്ടർ കൊലപാതകക്കേസിൽ ജീവപര്യന്തം ശിക്ഷിക്കപ്പെട്ട ഡിവൈ.എസ്.പി ഷാജിയുൾപ്പെടെ രണ്ട് ഡസനിലധികം ജീവപര്യന്തക്കാരും ഇപ്പോൾ വിയ്യൂരിലാണ്.
ഇതൊക്കെ ഉണ്ടിവിടെ..
152 സെല്ലുകൾ
537 പേരെ പാർപ്പിക്കാം
9 ഏക്കർ വിസ്തൃതി
1.10 ലക്ഷം സ്ക്വയർഫീറ്ര് കെട്ടിടം
നിലവിൽ 370 തടവുകാർ