ചിറയിൻകീഴ്: കേരള കയർ തൊഴിലാളി ക്ഷേമനിധി ബോർഡ് 2019 - 20 വർഷത്തെ ഡിഗ്രി, പ്രൊഫഷണൽ കോഴ്സുകളിലേക്കുള്ള വിദ്യാഭ്യാസ ധനസഹായത്തിന് അപേക്ഷ ക്ഷണിച്ചു. കയർ തൊഴിലാളി ക്ഷേമനിധിയിൽ അംഗത്വമെടുത്ത് 2019 മെയ് 31നു രണ്ട് വർഷം പൂർത്തീകരിച്ച് കുടിശ്ശിക കൂടാതെ വിഹിതം അടച്ചുവരുന്ന തൊഴിലാളികളുടെ മക്കൾക്കാണ് ധനസഹായത്തിന് അർഹതയുള്ളത്. കേരളത്തിലെ ഗവൺമെന്റ് അംഗീകൃത സ്ഥാപനങ്ങളിൽ സർക്കാർ അംഗീകൃത ഫുൾടൈം കോഴ്സുകളിൽ ഡിഗ്രി, പി.ജി, പ്രൊഫഷണൽ കോഴ്സുകൾ, പോളിടെക്നിക്ക്, എൻജിനിയറിംഗ്, മെഡിസിൻ, അഗ്രികൾച്ചർ, നഴ്സിംഗ്, പാരാമെഡിക്കൽ കോഴ്സുകളിൽ ഉപരിപഠനം നടത്തുന്നതിനാണ് ധനസഹായം അനുവദിക്കുന്നത്. ആബി ഇൻഷുറൻസിൽ അംഗമായിട്ടുള്ള കയർ തൊഴിലാളികളുടെ മക്കൾക്കുള്ള 9, 10, +1, +2, ഐ.ടി.ഐ കോഴ് സുകളിലേക്കുള്ള സ്കോളർഷിപ്പിന് ഇത് പ്രകാരം അപേക്ഷ നൽകേണ്ടതില്ല. എൽ.ഐ.സി അറിയിക്കുന്ന മുറയ്ക്ക് ഇവർ ഓൺലൈനായി 2019-20 വർഷത്തെ അപേക്ഷ സമർപ്പിച്ചാൽ മതിയാകും. അപേക്ഷ ഫാറം പത്ത് രൂപ നിരക്കിൽ ബോർഡിന്റെ എല്ലാ ഓഫീസുകളിൽ നിന്നും ലഭിക്കുന്നതാണ്. പൂരിപ്പിച്ച അപേക്ഷാഫാറങ്ങൾ കയർ തൊഴിലാളി ക്ഷേമനിധി ബോർഡിന്റെ എല്ലാ ഓഫീസുകളിലും ഫെബ്രുവരി 29 വരെ സ്വീകരിക്കുന്നതാണെന്ന് ചീഫ് എക്സിക്യൂട്ടീവ് ഓഫീസർ അറിയിച്ചു.