വെഞ്ഞാറമൂട്: ടൂറിസ്റ്റ് കേന്ദ്രമായ വെള്ളാണിക്കൽ പാറയുടെ അടിഭാഗത്തെ കുറ്റിക്കാടിന് തീ പിടിച്ചു. അഗ്‌നി രക്ഷാ സേന സ്ഥലത്ത് എത്തി തീ നിയന്ത്രണ വിധേയമാക്കി.രണ്ടേക്കറോളം കുറ്റിക്കാട് കത്തി. കഴിഞ്ഞ ദിവസം വൈകിട്ട് 5 നായിരുന്നു സംഭവം. വേങ്ങോട് റോഡിനരികിൽ നിന്നാണ് തീ പിടിത്തമുണ്ടായതെന്ന് നാട്ടുകാർ പറയുന്നു. പ്രദേശത്ത് എത്തിയവരിൽ ആരോ ഉപേക്ഷിച്ച സിഗരറ്റ് കുറ്റിയിൽ നിന്നോ തീപ്പെട്ടി കൊള്ളിയിൽ നിന്നോ ആകാം തീ പടർന്നതെന്നാണ് സംശയം. സ്ഥലത്തുണ്ടായിരുന്നവർ അറിയിച്ചതനുസരിച്ച് വെഞ്ഞാറമൂട് - ആറ്റിങ്ങൽ അഗ്നി രക്ഷാ സേനകൾ സ്ഥലത്തെത്തി തീ കെടുത്തുകയായിരുന്നു. കഴിഞ്ഞ ഒരാഴ്ചക്കുള്ളിൽ മൂന്നാം തവണയാണ് ഇവിടെ തീപിടുത്തമുണ്ടായത്.സീനിയർ ഫയർ ഓഫീസർ അജിത് കുമാറിന്റെ നേതൃത്വത്തിലുള്ള സംഘമാണ് രക്ഷാപ്രവർത്തനത്തിൽ പങ്കെടുത്തത്.