പെരുമ്പാവൂർ: എം.സി. റോഡിൽ കീഴില്ലത്ത് നിരുത്തിയിട്ടിരുന്ന ലോറിയിൽ കാറിടിച്ച് രണ്ടുപേർ മരിച്ചു. കാറിലുണ്ടായിരുന്ന മൂന്നുപേർക്ക് പരിക്കേറ്റു. പെരുമാനി സ്വദേശിയും ബിൽഡിംഗ് കോൺട്രാക്ടറുമായ മാടശേരി കല്ലറയ്ക്കൽ വീട്ടിൽ എൽദോ ജോസ് (53), തൊഴിലാളിയായ ബംഗാൾ മൂർഷിദാബാദ് ഡൊങ്കൽ സ്വദേശി സ്വാതിൻ മണ്ഡൽ (22) എന്നിവരാണ് മരിച്ചത്. ഇന്നലെ പുലർച്ചെ ഒരു മണിയോടെ ആയിരുന്നു അപകടം. തിരുവല്ലയിലെ സൈറ്റിൽനിന്ന് മടങ്ങിവരവെ ഇവർ സഞ്ചരിച്ചിരുന്ന കാർ ലോറിയിലേക്ക് ഇടിച്ചു കയറുകയായിരുന്നു.

സോഫിയാണ് എൽദോയുടെ ഭാര്യ. മക്കൾ: എമിൻ സൂസൻ എൽദോ, ഏലിയാസ് എം. എൽദോ.
സ്വാതിൻ മണ്ഡലിന് ഭാര്യയും മൂന്നുമാസം പ്രായമായ കുട്ടിയുമുണ്ട്. ഞായറാഴ്ച നാട്ടിലേക്ക് പോകാൻ ടിക്കറ്റെടുത്തിരുന്നു.